Qamshy.kz aqparat agenttiginiń poshtasyna depýtat Baqytbek Smaǵulovtyń QR Premer-mınısıtri Baqytjan Saǵyntaevqa arnalǵan haty kelip tústi. Hatty nazarlaryńyzǵa usynamyz.
QR Premer-Mınıstri B.Á.Saǵyntaevqa
Qurmetti Baqytjan Ábdiruly!
Elbasy Táýelsizdiktiń alǵashqy jyldarynan beri adamı kapıtaldyń damýyna basa mán berip keledi. «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty bıylǵy Joldaýynda Memleket basshysy adamı kapıtaldy – «jańǵyrý negizi» dep atady. Munyń qorǵanys salasyna da tikeleı qatysy bar.
Barlyq ozyq elderde jaýyngerlerdiń sapasyna, jeke quramnyń moraldyq-psıhologıalyq jaǵdaıyna degen qamqorlyq memlekettik saıasat deńgeıine shyǵarylǵan. Óıtkeni áskerılerdiń bıik rýhy, Qarýly Kúshterdegi qyzmetin maqtanysh tutýy saıyp kelgende, jaýyngerlik daıarlyqty jáne eldiń qorǵanys qabiletin joǵarǵy deńgeıde qamtamasyz etýge yqpal etedi. Qazirgi zamanǵy Armıaǵa júktelgen mindetter áskerı qyzmetkerlerdi áskerı tárbıeleýdi uıymdastyrýǵa, olardyń boıynda kásibı, áskerı jáne adamgershilik qasıetterdi qalyptastyrý isine joǵary talaptar qoıady.
Elimizdegi áskerı tárbıe júıesin jaqsartý jáne jetildirý, áskerı tártipti nyǵaıtý maqsatynda 1993 jylǵy 19 qańtarda «Qazaqstan Respýblıkasynyń Qarýly Kúshterinde komandırlerdiń (bastyqtardyń) tárbıe jáne áleýmettik-quqyqtyq jumys jónindegi orynbasarlarynyń ınstıtýtyn qurý týraly» el Prezıdentiniń N1084 Jarlyǵy qabyldandy. Onda:
«Qazaqstan Respýblıkasynyń Qarýly Kúshterinde Qorǵanys mınıstrligi apparatynan, Respýblıkalyq ulannan, Shekara jáne Ishki áskerlerinen, áskerı mekemelerden bastap rotalarǵa deıingi býyndarda komandırlerdiń (bastyqtardyń) tárbıe jáne áleýmettik-quqyqtyq jumys jónindegi orynbasarlarynyń ınstıtýty engizilsin», – dep anyq jazylǵan. Osylaısha, Táýelsizdiktiń alǵashqy jyldarynda Qarýly Kúshterdegi tárbıe jáne áleýmettik-quqyqtyq jumystyń (ary qaraı – TÁQJ) irgeli negizi qalandy. Elbasy Jarlyǵyna sáıkes, «TÁQJ boıynsha orynbasarlar ınstıtýty» Qorǵanys mınıstrligi ortalyq apparatynan bastap, barlyq atalǵan býyndarǵa deıin engizildi.
Alaıda keıin bul sala ózgeriske ushyrap, qazirgi ýaqytta Qarýly Kúshterde atalǵan jumys Bas shtabqa júktelgen. Osynyń nátıjesinde, qazirgi kezde QR QM ortalyq apparatynda TÁQJ-nyń derbes basqarý organy joq; tárbıe jáne áleýmettik-quqyqtyq jumystardy uıymdastyrýmen, jeke quramnyń moraldyq-psıhologıalyq ahýalyn jáne áskerı tártibin nyǵaıtýmen QR QK Bas shtabynyń Tárbıe jáne ıdeologıalyq jumystar Departamenti aınalysady. Al bul TÁQJ organdary mártebesine jaýap bermeıdi. Sonymen birge Memleket basshysynyń 1993 jylǵy 19 qańtardaǵy Jarlyǵynyń erejeleri tolyqqandy oryndalmaı otyr.
Biz qosylatyn damyǵan elderde bul iske qorǵanys vedomstvosy basshysy orynbasarynyń biriniń jaýapkershiligi naqty belgilengen. Bul elderdiń armıalarynda TÁQJ júıesi qarýly kúshteriniń barlyq qurylymdarynda tıisti apparatynyń, qatań baǵynysty ári keń taralǵan ártúrli qyzmetteriniń jumys jasaýymen; bul organdar quzyrynda joǵary bilikti kadrlyq quramnyń, qýatty materıaldyq jáne qarjylyq bazanyń bolýymen; ádistemelik qamtamasyz etilýimen; sheshilýge tıis mindetterge keshendi kelýimen erekshelenedi.
Osyǵan baılanysty birinshiden, TÁQJ deńgeıin kóterip, Qorǵanys mınıstriniń tárbıe jáne áleýmettik-quqyqtyq jumys jónindegi orynbasary laýazymyn qaıta qalpyna keltirýdi usynamyn.
Ekinshiden, Qazaqstanda qorǵanys salasyndaǵy memlekettik saıasatty, Qarýly Kúshterdi áskerı-saıası jáne áskerı-ekonomıkalyq basqarýdy júzege asyrý Qorǵanys mınıstrliginiń quzyrynda. Demek, Qarýly Kúshterde, basqa da áskerler men áskerı qurylymdarda TÁQJ uıymdastyrýda birińǵaı tásildemeniń negizin qalaýshy da Qorǵanys mınıstrligi bolýǵa tıis. Alaıda Mınıstrliktiń atalǵan basshylyq róliniń joqtyǵy nátıjesinde TÁQJ uıymdastyrýdyń birińǵaı júıesi de joq bolyp otyr. Al áskerı vedomstvolardyń (UQK Shekara qyzmeti, Ulttyq ulan, Memlekettik kúzet qyzmeti) áskerı basqarý organdary ózderi basqaratyn áskerı qyzmetkerlerdi tárbıeleý salasyndaǵy kózqarastar men nusqamalar júıeleriniń tujyrymdamasyn árqaısysy óz betinshe anyqtaýǵa májbúr.
Joǵaryda aıtylǵandy eskere otyryp, tárbıe jáne ıdeologıalyq jumystardy uıymdastyrýdaǵy TÁQJ organdarynyń qyzmetterin birigeılendirý jáne birizdi etý maqsatynda, Qarýly Kúshter, basqa da áskerler men áskerı qurylymdarda tárbıe jáne áleýmettik-quqyqtyq jumystardy uıymdastyrý Tujyrymdamasy túrindegi basshylyq qujatty ázirleýdi jáne ádistemelik negizin daıyndaýdy Qorǵanys mınıstrligi júzege asyrǵany abzal.
Úshinshiden, Qarýly Kúshterdegi tárbıe jáne áleýmettik-quqyqtyq jumys baǵyttary qaıta qaralyp, Elbasy jarıalaǵan rýhanı jáne tehnologıalyq jańǵyrý mindetterimen jáne talaptarymen ushtastyrylýǵa tıis. Osy maqsatta arnaıy baǵdarlamalar ázirlenip, praktıkalyq turǵyda júzege asyrylǵany jón. Sonda qazirgi zamanda elimizdiń aldyna qoıylyp otyrǵan maqsattarǵa oraı áskerı qyzmetkerlerdiń barlyq sanattarynan talap etiletin qasıetterdiń qalyptastyrylýyna jáne nyǵaıýyna qol jetkizemiz.
Tórtinshiden, Qorǵanys mınıstrligi Qazaqstan Respýblıkasyn qorǵaý jáne qaýipsizdigin qamtamasyz etý salasyndaǵy memlekettik saıasatty júrgizýde Qarýly Kúshter, basqa da áskerler men áskerı qurylymdardyń tárbıeleý organdarynyń jumystaryn úılestirýge jáne ózara is-qımylyn uıymdastyrýǵa tıis.
Alaıda Qorǵanys mınıstrliginiń tárbıe jáne ıdeologıalyq jumystar Departamenti óskeleń urpaqqa patrıottyq tárbıe berý jumystaryn qajetti deńgeıde júrgizip otyrǵan joq, bul jumystar búginde «Jas sarbaz» áskerı-patrıottyq synyptaryn qurýmen, sondaı-aq jylyna 1 ret «Aıbyn» konkýrsyn ótkizýmen jáne jastardy áskerı-patrıottyq tárbıeleý salasynda yntymaqtastyq pen ózara is-qımyl týraly Memorandýmǵa qol qoıýmen ǵana shektelip otyr.
Ekshn stılindegi otandyq tolyq metrajdy kórkem fılmder, QR QK, basqa da áskerler men áskerı qurylymdary týraly oqý, derekti, ǵylymı-tanymdyq, aǵartý fılmderdi jasap shyǵarý boıynsha belsendi áreketter joq, bólingen búdjettik qarajattar jastardy qyzyqtyra almaıtyn armıalyq serıaldar túsirýge jumsalady.
Sol sebepti jurtshylyq, ásirese, jastar arasynda áskerı qyzmettiń bedelin kóterý, qoǵamdyq sanada Otan qorǵaýshynyń oń beınesin somdaý úshin aqparattyq qamtamasyz etý isiniń naqty túzilgen júıesi bolýǵa tıis. Bul rette Qazaqstanda jeke áskerı telearna qurý máselesin qarastyrýdy suraımyn.
Anyqtama retinde: máselen, AQSH-ty aıtpaǵanda, Fransıa Qarýly Kúshteriniń Aqparat jáne qoǵamdyq qatynastar qyzmeti óz betinshe nemese azamattyq uıymdarmen birge jyl saıyn shamamen 30 fılm, 70 beıneklıp, tele jáne foto reportajdar, aqparattyq jáne rýh kóterýshi materıaldary bar 12 myń dıski shyǵarady.
Besinshiden, Elbasy jarıalaǵan «Rýhanı jańǵyrý» baǵdarlamasyndaǵy bastamany úlgi ete otyryp, táýelsiz Qazaqstannyń Otan qorǵaýshylarynyń qaharmandyǵy men jetistikterin kórsetip, qoǵam arasynda nasıhattaıtyn «Áskerdegi 100 jańa esim» jobasyn ótkizýdi usynamyn.
Qurmetti Baqytjan Ábdiruly, Sizden joǵaryda aıtylǵan máselelerdi qarastyrýyńyzdy jáne qaraý nátıjeleri týraly zańmen belgilengen merzimde habarlaýyńyzdy suraımyn.
Qurmetpen,
«Nur Otan» partıasy
Fraksıasynyń depýtaty
Baqytbek Smaǵul
