Eýroodaq Reseıdiń 150 azamaty men 38 kompanıasyna qatysty sanksıalar merzimin jarty jylǵa uzartty. Bul týraly Eýropa Keńesiniń resmı saıtynda habarlandy.
Shekteýler Ýkraınanyń aýmaqtyq tutastyǵy men táýelsizdigine qaýip tóndirýge baılanysty salynǵan. Brússeldiń pikirinshe, Reseıde qalyptasqan jaǵdaı sanksıany ózgertýge múmkindik bermeıdi.
Sanksıaǵa ilingen reseılikter men kompanıalardyń aktıvteri buǵattalyp, EO-ǵa saparlaýyna tyıym salynady.
EO men AQSH Kremlge qarsy sanksıasyn 2014 jyly Reseı Qyrymdy aneksıalap, Donbastaǵy qaqtyǵysqa kılikkeni úshin salǵan. Máskeý Qyrymdy Reseıge qosyp alǵanyn «tarıhı ádildiktiń ornaýy» dep ataıdy, biraq Ýkraınadaǵy soǵysqa qatysy baryn joqqa shyǵarady.
