Jambyl oblysynyń qylmystyq ister jónindegi mamandandyrylǵan aýdanaralyq sotynda Murathan Toqmádıdiń isine qatysty sot otyrysy bastaldy, dep habarlaıdy Qamshy.kz aqparat agenttigi. Bul týraly Tengrinews.kz jazdy.
Prokýror Murathan Toqmádıdi 11 jyl jáne 6 aıǵa bas bostandyǵynan aıyrýdy surady. Sondaı-aq, ol bıznesmenniń jasaǵan qylmystaryn jınaqtap, ony 12 jylǵa qamaýǵa alýdy surady. Munymen qosa, memlekettik aıyptaýshy Toqmádıdiń júrgizilgen saraptamalardyń shyǵyny retinde memlekettik búdjetke 356 000 teńge tóleýin surady. Memlekettik aıyptaýshy qorytyndy aıyptaýlardy bir saǵat ýaqyttan asa oqydy. Sarapshylar men tergeý saraptamalarynyń qorytyndylary qaıta aıtyldy. Tergeý qarýdyń ózdiginen atylyp kete almaıdy jáne osyǵan deıin júrgizilgen saraptamalar mehanıkalyq kedergilerdiń saldarynan durys bolmaı shyqty degen qorytyndyǵa keldi. Bul qorytyndylardy sheteldik sarapshylar da rastady. Al Murathan Toqmádıdiń advokaty sottalýshyǵa 10 jyldan asa ýaqyt merzim bermeýin surady.
«Osy qylmysty óziniń jáne jaqyndarynyń ómiri úshin qoryqqandyqtan jasady. Bul jazany jeńildetedi. Sondaı-aq, ol kináni ózi moıyndady. Qylmysty ashýǵa kómektesti. Toqmádı prosesýaldyq kelisimdegi sharttardyń barlyǵyn oryndady. Sondaı-aq, sottalýshynyń 5 balasy bar ekenin eskerýdi suraımyn», - dedi Toqmádıdiń advokaty.
«Moıyndaımyn, ókinemin. Barlyq jaǵdaıdy eskerýdi suraımyn. (...) Taǵylǵan aıyptarmen kelisemen. Kámeletke tolmaǵan balalarymnyń bar ekenin eskerýdi suraımyn. Prosesýaldyq kelisimdegi sharttardyń barlyǵyn oryndadym», - dedi Toqmádı sotta.
Eske sala keteıik, 8 naýryzda áleýmettik jelilerde Murathan Toqmádıdiń qashyp ketkeni jaıly málimet taralǵan edi. "08.03.2018 jyly keshki 19.30 ben 20.00 arasynda Tarazdaǵy oblystyq aýrýhanadan Murathan Toqmádı belgisiz baǵytta qashyp ketken, ol adam óltirdi degen aıyppen qamaýda bolǵan. Ol tizege deıin túsetin qara kúrte men djıns kıgen, aıaǵynda ne týflı, ne krosovka bolǵan", - delingen edi habarlamada. Biraq bıznesmen keıinirek ustalyp, UQK onyń ustalýyna qatysty pikir bildirgen edi.
Sondaı-aq, osyǵan deıingi sot otyrysynda bıznesmen óz kinásin moıyndaǵan edi.
Murathan Toqmádı byltyr 12 maýsymda ustalǵan bolatyn. Almatyda arnaıy qyzmet «Depýtattyq korpýs» atty qylmystyq topty ustaý boıynsha operasıa ótkizgen edi. BAQ-ta shyqqan aqparat boıynsha, bul qylmystyq topty «QazSHynyQurylys» zaýytynyń ıesi Murathan Toqmádı basqarǵan. Sondaı-aq, prokýratýra málimetinshe, onyń úıin tintý kezinde qarý-jaraq pen oq-dári tabylǵan. Al taıaýda bıznesmenge qatysty úkim shyqqan. Murathan Toqmádı 3 jylǵa bas bostandyǵynan aıyrylǵan bolatyn.
