Dáýlet Arǵyndyqov myrza shettegi mıllıondaǵan qandasymyzdyń kóz tigip otyrǵan zań jobasyn oryssha tanystyrdy. Ol depýtattardyń qazaqsha saýaldaryn túsinbedi de, olardyń saýalyn oryssha qoıýyn talap etti. Iaǵnı, zańdy tanystyrýǵa kelgen sheneýniktiń memlekettik tilde sóıleýi bylaı tursyn, túsinbeýi depýtattardyń da, zań jobasyn tyńdaýǵa kelgen oralmandardyń da synyna ushyrady. Óıtkeni áleýmettiń muńyn tyńdap, olardyń kóńilinen shyǵatyn zań jasaý úshin olardyń tilinde sóılep, muńyn da muńdaı bilý qajet. Onsyz tolyqqandy zań qabyldaý múmkin emes. Ókinishke qaraı, Densaýlyq jáne halyqty áleýmettik qorǵaý mınıstri Tamara Dúısenova hanym oralmandardyń quqyqtyq máselelerin sheshýge bel sheship kiriskenimen, onyń qaramaǵyndaǵy sheneýniktiń murnyna bul máseleniń ıisi de barmaıtyndyǵy ańǵarylyp qaldy.
Sondaı-aq, zań jobasyna qatysýshy jumys tobynyń ókilderi búginde turaqty tirkeýiniń merzimi aıaqtalǵan, Qazaqstannan deportasıalanýy tıis sheteldik qazaqtardyń qujatynyń merzimin sozýǵa qandaı da bir jeńildik bola ma degen suraǵyna da, merez sheneýnikten merez jaýap aldy. Qujatynyń ýaqyty aıaqtalǵan, tirkeýi joq shetel azamattary Qazaqstannan shyǵarylýy tıis. Úkimetti shyǵý vızasymen Qazaqstannan shyǵyp ketken qazaqtardyń bes jylsyz eldiń esigin qaıta asha almaıtyndyǵy tolǵandyryp otyrǵan joq.
Tipti, depýtattardyń biri "sapasyz qazaqtardy shaqyra berip qaıtemiz, olardyń jetpis paıyzy bilimsiz, olar Qazaqstanǵa kelgennen keıin, ózin-ózi qamtamasyz etýshi toptyń quramyn tolyqtyrady. Odan da sapaly qazaqty shaqyraıyq" dep aıdy aspanǵa biraq shyǵardy. Alaıda, Densaýlyq jáne halyqty áleýmettik qorǵaý mınıstrligi Kóshi-qon komıteti tóraǵasynyń orynbasary Aslan Qarjaýbaev "Qazaqstanǵa qandaı qazaq bolsa da kerek. Ári taıaý jyldarda bul saıasat ózgermeıtin bolýy tıis" dep jaýap qatty. Demek, Aslan myrza Qazaqstan bıliginiń ishki esebin de, ulttyq saıasatyn da jaqsy túsinip otyr. "Sannan sapaǵa" degen markstik ilimdi de esine myqtap ustaǵan. Qazaq óz elinde áli de az. Sol sebepti de óz úıine ózi qojaıyn bola almaı keledi. Eger sandyq turǵydan artsa, sapalyq turǵydan nátıje beretini de anyq.
Jaqynda "31kanal" arnasy Yqtıar haty bolsa da, tirkelý merzimi aıaqtalǵan bir oralmannyń Qazaqstannan ketýge májbúr ekendigin, ekinshisi Qazaqstan azamaty atana almaǵandyǵynan perzenthanada bosanǵan áıelin aqshanyń joqtyǵynan shyǵara almaı shyryldap júrgendigin kórsetti. Alaıda Qazaqstan bıligi bul beıbaqtardyń Qazaqstanda tirkelýine qol ushyn sozýdy oılap otyrǵan joq.
"Zań solaı" degen jeleýmen elden alastap jiberýdi kózdeýde. Atalǵan zań jobasy ótkelekten ótip bolǵansha, tirkele almaı júrgen myńdaǵan qandasymyzdan jan shyǵatyn sekildi.
"Túrkistan" gazeti
