Nazarbaev resmı saparmen Birikken Arab Ámirlikterine bardy. Qarsy alý rásiminen soń Nursultan Nazarbaev Abý-Dabıdiń taq murageri, Birikken Arab Ámirlikteri Qarýly kúshteriniń Joǵarǵy Bas qolbasshysynyń orynbasary, sheıh Muhammed ben Zaıd Ál Nahaıanmen keńeıtilgen quramda kelissóz júrgizdi, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasaı otyryp.
Qazaqstan Prezıdenti qonaqjaılyq kórsetkeni úshin Muhammed ben Zaıd Ál Nahaıanǵa rızashylyq bildirdi.
«Meniń resmı saparymnyń Birikken Arab Ámirlikteriniń negizin qalaǵan sheıh Zaıd ben Sultan Ál Nahaıannyń 100 jyldyǵymen tuspa-tus kelýiniń sımvoldyq máni bar. Men úshin Sizdiń ákeńizben tanys bolǵanym – zor mártebe», – dedi Memleket basshysy.
Nursultan Nazarbaev baýyrlas qarym-qatynastar men tabysty kezdesýler eki el arasyndaǵy baılanystardyń damýyna tyń serpin beretinin atap ótti.
«Ózara ýaǵdalastyqtardy iske asyrýdyń arqasynda tek 2017 jyly saýda-sattyq kólemi 2 ese ósip, 374 mıllıon dollardan 643 mıllıon dollarǵa deıin jetti. Al 2015 jyldan bastap bul kórsetkish 6 ese artty», – dedi Qazaqstan prezıdenti.
Nursultan Nazarbaev vızasyz rejim engizý eki el arasyndaǵy qarym-qatynastarǵa oń áser etetinine nazar aýdaryp, taraptar ınvestısıalardy qorǵaý, ǵarysh tehnologıalary, sý energetıkasy, munaı hımıasy, aýyl sharýashylyǵy jáne sıfrlandyrý salalaryndaǵy yntymaqtastyqty ári qaraı ilgeriletýge múddeli ekenin atap ótti.
Sońynda Qazaqstan prezıdenti Birikken Arab Ámirlikteriniń prezıdenti sheıh Halıf ben Zaıd Ál Nahaıanǵa degen nıettestigin bildirip, taq murageri Muhammed ben Zaıd Ál Nahaıandy Qazaqstanǵa resmı saparmen kelýge shaqyrdy.
Muhammed ben Zaıd Ál Nahaıan resmı saparmen kelgeni úshin Nursultan Nazarbaevqa alǵys aıtty.
«Halqymnyń jáne jeke ózimniń atynan Sizge Birikken Arab Ámirlikteri jerine kelgenińiz úshin rızashylyq bildiremin. Saparyńyz sátti bolady dep senemin. Biz búgin birqatar mańyzdy ekijaqty qujattarǵa qol qoıamyz. Jan-jaqty yntymaqtastyqqa daıyn ekenimizdi aıtqym keledi», – dedi Muhammed ben Zaıd Ál Nahaıan.
Resmı sapar barysynda taraptar arasynda mynadaı qujattarǵa qol qoıyldy:
- Qazaqstan Respýblıkasynyń Úkimeti men Birikken Arab Ámirlikteriniń Úkimeti arasyndaǵy Investısıalardy kótermeleý jáne ózara qorǵaý týraly kelisim;
- Atyraý oblysynda ıntegrasıalanǵan gaz-hımıa keshenin (polıetılen óndirisi) salýǵa qatysty yntymaqtastyqtyń negizgi sharttary týraly memorandým;
- Atyraý oblysyndaǵy polıpropılen óndiretin zaýyt jumysyna qatysý úlesin satyp alýǵa baılanysty ózara túsinistik týraly memorandým;
- "Aqtaý teńiz porty" arnaıy ekonomıkalyq aımaǵy aksıonerlik qoǵamynyń 49% aksıasyn satyp alýdyń negizgi qaǵıdattary týraly negizdemelik kelisim;
- "DP World" kompanıasynyń "Qorǵas – Shyǵys qaqpasy" arnaıy ekonomıkalyq aımaǵynyń basqarýshy kompanıasy" aksıonerlik qoǵamynyń kapıtalyna qatysýynyń negizgi qaǵıdattary týraly negizdemelik kelisim;
- Dýbaıdaǵy "EKSPO-2020" dúnıejúzilik kórmesine qatysý týraly shart.
