Qapshaǵaıda Ulystyń uly meıramy Naýryz merekesi tal egýden bastaldy. Turǵyndarǵa jeti túrli dámnen daıyndalǵan naýryz kóje usynylyp, aq tilekter aıtylyp, ortalyq alańǵa jaǵalaı tigilgen kúıiz úıler merekeniń sánin kirgizdi.
Kóktemniń ulyq merekesinde Qydyr ata bastaǵan jáne Aldar kóse, Tazsha bala sıaqty qazaq ertegileriniń keıipkerleri bar teatrlandyrylǵan qoıylym kórsetilip, kópbalaly analarǵa altyn, kúmis alqalar tapsyryldy. Altyn alqany Ardaq Úınalaqova men Marıam Jumanova, kúmis alqany Nurgúl Ábırova men Aıbolǵan Lokasheva taqty.
«Qapshaǵaı qalasy Naýryz merekesine daıyndyqty tazalyqtan bastady. Oblys ákiminiń sheshimi boıynsha eki aılyq tazalyq kúnderi jarıalanǵan. Osyǵan oraı biz birneshe senbilik ótkizdik. Oǵan halyq baǵasyn bere jatar», -dedi Qapshaǵaı qalasy ákiminiń orynbasary İlıas Súgirov.
Meıram «Alataý ánderi», «Qulan saz» fólklorlyq ansambli men jergilikti ónerpazdar ázirlegen merekelik konsertke ulasty.
Al Almaty oblysynyń Labasy aýyldyq okrýginde Naýryz toıy ulttyq oıyndarmen erekshelendi. Aýyldaǵy aǵaıyn at jarystyryp, qoshqar kóterip, arqan tartysty.
Labasy taýynyń eteginde kóktemniń jarshysy báısheshek gúldedi. Dál osy jerde tórt aýyldyń halqy birneshe jyldan beri ulystyń uly kúni Naýryzdy toılap keledi. 6 myńǵa jýyq halyq jınalyp, qazan-qazan et asylyp, naýryz kójeden dám tatqan qonaqtardyń kóńilin ashyq kún raıy da eseleı tústi.
Bir jerde epti de bilekti, ıyqty da júrekti jigitter qoshqar kóterip, gir tasyn laqtyryp máre-sáre bolsa, endi bir jerde arqan tartyp, balýandar beldesip baq synasty.
«Osydan otyz jyl buryn bastalǵan uly toı Labasy baýraıynda birneshe jyldan beri osylaı aýqymdy ótip keledi, - deıdi mádenıet jáne sport salasynyń ardageri Baqyt Sheńgelbaev.
Ol osy jerde 30 jyl buryn Naýryzdy atap ótken jandardyń biri. Zeınetkerdiń aıtýynsha, 1988 jyly kóshe-kóshe bolyp jınalyp, uıymshyldyq tanytyp atap ótken. Qazir de sol aýyzbirliktiń arqasynda dúbirletip toı ótip jatyr.
Qystan aman shyqqan aýyl jurtynyń bul toıda asyǵa kútkeni - at jarysy. Halyq top báıge men taı jarys, alaman báıgeni kórip kóńil toıdyrdy. Jankúıer bolyp qıqýlap, shabandozdardy demedi. Teńge ilý men qyz qýý oıyndary da óte qyzyqty ótti. Shabandoz qyzdyń mińgen tulpary durys shappaı jigit jyldam qýyp jetip aldy. Al boıjetkenniń aty aıaqtan shalynyp, ıesin qulatyp aldy. Sondaı-aq teńge ilýde de bir azamat mingen atynan bir qulap turdy. Abyroı bolǵanda shabandozdar da, jylqy da din aman.
Aýyldaǵy Naýryz toıynda báıgede oza shapqandar oljaly boldy. Qarjylaı jáne tórt túlik maldaı júldelerin qanjyǵalaryna baılady. Ulystyń uly kúninde bir birimen qımaı tarqasqan aǵaıyndy endi kóktemniń dala jumystary kútýde.
