Ulystyń uly kúni — áz naýryz merekesi elimizdiń ár túkpirinde toılanyp jatyr. Osy bir aıtýly meıramdy qalamgerler qaýymy da erekshe yqylaspen qarsy aldy dep jazady Qamshy.kz aqparat agenttigi. Qazaqstan Jazýshylar odaǵy uıymdastyrǵan naýryz toıy araǵa birneshe jyl úzilis salyp, qaıta jańǵyryp otyr.

Mereke kúni Jazýshylar odaǵynyń ǵımaraty aldyna arnaıy kıiz úıler tigilip, naýryz kóje ázirlenip, ulttyq meıram dýmany aıryqsha saltanatpen ótti.

Qazaqstan jazýshylar odaǵy basqarmasynyń tóraǵasy, Qazaqstan Respýblıkasy Memlekettik syılyǵynyń ıegeri, aqyn Ulyqbek Esdáýlet merekelik sharany ashyp, quttyqtaý sóz sóıledi. Jınalǵan jurtshylyqqa izgi tilegin aıtyp, jańa jyldyń jaqsy jańalyqtarǵa toly bolýyna tilektestik bildirdi. 

Qazaqstannyń Halyq jazýshysy Qabdesh Jumadilov aqsaqaldar atynan sóz alyp, batasyn berdi.

Kesh barasynda aqyndar qaýymy óleń oqyp, jyrdan shashý shashty. Maraltaı Raıymbekuly, Amanǵazy Káripjan, Erlan Júnis bastaǵan aqyndardyń óleń-jyry kesh kórkin qyzdyrdy.

Birqatar jazýshylarǵa Qazaqstan Respýblıkasynyń Mádenıet jáne sport mınıstri Arystanbek Muhamedıulynyń quttyqtaýy tabys etildi.

Qazaqstan jazýshylar odaǵynyń jańa basshysy Ulyqbek Esdáýlet jazýshylar odaǵynda abyroıly eńbek etip, erekshe kózge túsken birqatar qyzmetkerdi alǵys hatpen marapattady.

«Aq jaýyn» Memlekettik kameralyq orkestri shymyldyǵyn túrgen naýryz toıynda ánshi, kompazıtor Qadyrǵalı Kóbentaı bastaǵan óner ıeleri ánderin tartý etti.

Qonaqtar Jazýshylar odaǵynyń ǵımaraty aldynda tigilgen kıiz úılerge aıaldap, naýryz kóje iship, arnaıy jaıylǵan dastarhannan dám tatty.

Naýryz toıyna jınalǵan aǵaıynnyń mereıi tasyp, aq tilegin aqtaryp, merekeni erekshe qýanyshpen ótkizdi.