Óńirimizdegi sapaly bilim men sanaly tárbıe berý jaıyn talqylaǵan alqaly jıyn oblys ákiminiń orynbasary Jaqsylyq Omardyń tóraǵalyǵymen ótti. Taldyqorǵan polıtehnıkalyq kolejinde ótken jıynǵa bilim basqarmasynyń qyzmetkerleri, aýdan, qala ákimderiniń orynbasarlary, bilim bólimi basshylary men mektep dırektorlary qatysty.
Oblysymyzda jyl saıyn ondaǵan bilim ordasy paıdalanýǵa berilip, jetkinshekterdiń alańsyz bilim alýyna jaǵdaı jasalyp otyr. Alaıda, bilim sapasy kóńil kónshitpeı otyr. Salada qordalanǵan másele kóp.
Keńeste oblystyq bilim basqarmasynyń basshysy Dáýren Júnisov bilim sapasyn jaqsartý, Ulttyq biryńǵaı testileýge daıyndyq týrasynda baıandama jasady.
Oblys ákiminiń orynbasary J. Omar ótken jylǵy bilim synaǵynda tómen nátıje kórsetken Jambyl, Panfılov, Kerbulaq aýdandarynyń bilim bóliminiń basshylaryn jáne mektep dırektorlaryn oryndarynan turǵyzyp, máseleniń mán-jaıyn surady. Sondaı-aq, eń nashar bilim deńgeıin kórsetip otyrǵan bes birdeı mektep dırektorlaryn jumystan bosatýdy da tapsyrdy.
Munan ári oblystyq bilim basqarmasy basshysynyń orynbasary J. Súleımenova jasóspirimder arasyndaǵy qylmysty tilge tıek etti. Eń aýyry- mektep qabyrǵasynda bilim alyp júrgen qyzdardyń júkti bolýy. Oblystyq densaýlyq saqtaý basqarmasynyń málimetinshe, búginde 221 jasóspirim qyz júktilik boıynsha tirkeýge alynǵan. Osy boıynsha aýdan, qala ákimderiniń orynbasarlary men bilim bóliminiń basshylarynan suraý alǵan oblys ákiminiń orynbasaryn kópshiliginiń mundaı derekpen tanys bolmaýy qynjyltty.
Alqaly keńeste oblystyq bilim sapasyn baqylaý departamentiniń dırektory S. Dosmatovanyń da esebi tyńdaldy. Tekserý barysynda bastaýysh synyp oqýshylarynyń bilim deńgeıiniń tómendigi anyqtalǵan. 26 mekteptiń 19-ynda qorytyndy baǵalaý sáıkessizdigi baıqalǵan. Bul degen baǵany kótermelep qoıý, «Altyn belgige» úmitker emes oqýshylardy negizsiz jeteleý tárizdi jaıttar oryn alǵan.
