Baqtybaı Jolbarysuly atyndaǵy№18 orta mektep – lıseıinde Elbasy N.Nazarbaevtyń «Táýelsizdik dáýiri» atty kitaby boıynsha oqyrmandar konferensıasy ótti. Elbasynyń el  tarıhy men onyń erteńine degen kózqarasynyń bolashaq úshin taǵylymdy tarıh ekenin oqyrmandarǵa uǵyndyrý, jetkizý maqsatyn kózdegen shara  oqýshylardyń  qyzyǵýshylyǵyn týǵyzdy.

Mektep kitaphanashysy Marıa  Botaeva   kirispe sózinde: « Búgin sizdermen úlken tarıhı eńbektiń talqylaýyn ótkizbekpiz. Ol eńbek – Elbasynyń «Táýelsizdik dáýiri» kitaby. Bul  kitap tarıhı pýblısısıka  janrynda jazylǵan, onda elimizdiń tarıhynyń jańa betteri  men onyń erteńine degen kózqarasy baıandalǵan.  Táýelsiz memleketimizdiń  26 jyldyq qalyptasý kezeńderi saralanǵan. Sóz basynda Prezıdent: «Bul kitap meniń uly qoldaýshym, kemel keleshegine óziniń qazaqstandyq jolymen qaryshtaǵan jasampaz halqyma arnalady» dep kitaptyń mazmunyn aıqyndap beredi,-dedi.

        Kitapta «qazaqstandyq damý úlgisiniń» tabıǵaty men onyń evolúsıasy basty ustanymdary men qozǵaýshy kúshteri saralanǵan. Qazaqstandy jańǵyrtýdyń úsh tolqyny keńinen ashylyp kórsetilgen. «Birinshi jáne ekinshi jańǵyrý aıasynda totalıtarlyq júıeden túbegeıli ajyrap, naryqtyq ekonomıkany qurý jáne básekege barynsha qabiletti elý eldiń qataryna qosylý mindeti merziminen buryn oryndaldy. Úshinshi jańǵyrýdyń maqsaty elimizdi qalyptasqan jańa jahandyq  ahýal jaǵdaıynda jańǵyrta otyryp, álemdegi eń  órkendi 30 memlekettiń qataryna qosý ekendigi baıandalǵan.

«Táýelsizdik dáýiri» otandyq jáne sheteldik qalyń oqyrman qaýymdy qyzyqtyrar týyndy.Kitap elimizdiń jańa tarıhyn tutas qamtyǵan, mazmuny asa baı 4 bólimnen turady.  Tarıh pániniń muǵalimi Gúlnar Nurahmetova kitap  bólimderi boıynsha oqyrmandarǵa túsindirip berdi. Budan keıin oqýshylar óz oılarymen bólisti.

Mektep dırektorynyń  ǵylymı-ádistemelik jumystary jónindegi orynbasary   Bıǵaısha Qaýmetova: «Táýelsizdik dáýiri»- árbir  azamatymyzdyń  taǵdyry týraly jazylǵan kitap. Munda barlyq qazaqstandyqtardyń shejiresi men tarıhy qamtylǵan. Sol sebepti bolashaqta bul kitap  jastar úshin tereń bilim alatyn oqýlyqqa aınalýy tıis.  Egemendi el bolyp, «Táýelsizdiktiń kók baıraǵyn kótergen sát – Qazaqstannyń ár azamaty úshin qýanysh,tarıhtyń  úlken betburysy bolǵany anyq.  «Adam taǵdyry  Otanymen taǵdyrlas»- deıdi Elbasy.  «Qazaqstandy joǵary  damyǵan memleketke aınaldyratyn  azat oıly jańashyl da jasampaz azamattar. Ol úshin árkim jan – jaqty jáne kemel  bilimge den qoıyp, ózin – ózi tolassyz jetildirýdi ómir saltyna aınaldyrýy qajet» — dep konferensıany qorytyndylady.