Oblystyq «Jetisý» telearnasynyń tól ónimi «Án shyrqaıyq» baǵdarlamasynyń eki jyldyq mereıtoıyna oraı atalmysh arna ujymy qaıyrymdylyq kesh ótkizdi.

Óńirimiz qashanda jylaǵannyń kóz jasyn súrtip, jyǵylǵanǵa dem berip, qınalǵanǵa qol ushyn soza biletin jomart jandarǵa toly. Jetisý jurtshylyǵy bul joly da osy qalpynan aınymaı súıek qańqasynyń qaterli isigine shaldyqqan Azamat Raxymbektiń dertine beı-jaı qaramaı, balaqaıdyń emine qajetti qarajattyń bir bóligin jınady. Alańsyz asyr salar balǵyn balalyq shaǵyn úı men aýrýxana arasynda ótkizip júrgen qarshadaı balanyń «ómir súrem» dep aýyr dertpen kúresýi kim-kimniń de júregin syzdatqany sózsiz. Iá, ol osynaý ýaqytsha tóbede úıirilgen qara bulttyń bir kúni seıilerine, ýaıymsyz, qorqynyshsyz shuǵylaly aq tańnyń ataryna senedi. Bir otbasynyń izin jalǵastyrýshy urpaqty dúnıege ákelgen ana júregi de úmit sáýlesiniń sónbeıtinin sezedi.

Qaıyrymdylyq  sharasyna aımaǵymyzdyń, sonymen qatar, alyp shahar Almatydan arnaıy kelgen ónerpazdar da óz úlesterin qosty. Dáribaevtar otbasylyq ansambli, Lázzat Baıyrbekova, Eset Sádýaqasov, Estaı Álikeev syndy estrada juldyzdary ásem ánnen shashý shashty. Bıletten túsken 380 myń, «Qaıyrymdylyq jáshigine» jınalǵan, sondaı-aq,  júregi jomart kásipkerler usynǵan qarajat Azamattyń anasynyń qolyna tabystaldy.