M.Tynyshbaev atyndaǵy oblystyq tarıhı-ólketaný mýzeıinde Elbasynyń Rýhanı jańǵyrý baǵdarlamasy aıasynda reseılik sýretshi, músinshi, arhıtektor Margarıta Vashenko salǵan qazaqtyń dúldúl aqyny Sara Tastanbekqyzy beınelengen muralar saltanatty jaǵdaıda mýzeı qoryna tapsyryldy.

Týyndylar jeti aı buryn Máskeý qalasynan «Naq-Birlik» qoǵamdyq uıymynyń tikeleı at salysýymen, Baýyrjan Ospanov syndy mesenattardyń ,aqynnyń shyǵarmashylyǵyn dáripteıtin azamattardyń arqasynda elge jetkizilgen bolatyn. Qazaqstan halqynyń atynan sol týyndylardy elge ákelý jaýapkershiligi «Naq-Birlik» qoǵamdyq uıymynyń tóraıymy, Almaty oblysy analar alqasynyń múshesi Saltanat Meńlibaeva men Almaty oblystyq Qazaqstan halqy Assambleıasy hatshylyǵynyń bas mamany Ábilqaıyr Oralovqa júktelgen edi.

Mýzeı qoryna tapsyrylǵan jádigerlerdiń arasynda sýretshiniń túrli boıaýlarmen somdaǵan aqyn Saranyń 3 beıneportreti men Birjan — Saranyń aıtysy ótken (1871) «Toǵyzqumalaq» bókteriniń kórinisteri sýrettelgen barlyǵy 13 dana týyndy, Shákárim Qudaıberdıev pen Shoqan Ýálıhanovtyń shaǵyn bústteri jáne basqa da qundy qujattar bar.

Sharaǵa qatysqan azamattar aqynnyń dúnıege kelgenine 165jyl tolý qarsańynda oryn alǵan oń oqıǵanyń tarıhı mańyzdylyǵyna toqtalyp, qundy dúnıelerdiń halyqqa keńinen nasıhattalatynyna senim bildirdi.