Taldyqorǵandyq fotograf ári sýretshi Jeńis Ysqabaı ulttyq naqyshta oıynshyqtar qurastyrýda.
Jeńis Ysqabaı bala kezinen aǵashtan túıin túıip túrli buıymdar jasaýǵa áýes boldy. Qazir de negizi kásibinen qoly bosaı qalǵan sátte sheberhanasyna baryp, aǵash jonyp, sheberlik ónerin shyńdaýǵa kirisip ketedi. Qazir aǵash ustasy oıynshyq jylqynyń birneshe túrin qurastyrdy.
Al onyń bul jobaǵa kirisýine óz balalarynyń densaýlyǵyna alańdaýshylyq sebep boldy. Úsh balanyń ákesi sońǵy kezderi balalarynyń teledıdar kórse durys otyrmaıtynyn baıqaǵan. Sondaı-aq ózge de balalar sıaqty smartfonǵa telmirip, kompúter oıyndaryna tym beriletinin ańǵarǵan. Bul olardyń fızıkalyq damýyna keri áserin tıgizedi. Sondyqtan olardy aldandyratyn bir oıynshyq qurastarǵysy kelgenin aıtady.
Sheber aldymen bolashaq týyndysyn qaǵazǵa saldy. Sosyn kompúterge túsirip, ólshemderin pysyqtady. Kerekti materıaldaryn alyp, sheberhanada alǵashqy oıynshyǵyn jasap shyqty. Bala oǵan otyrǵanda ózin atqa mingendeı sezinedi. Ári-berii terbelgende búkil bulshyq etteri qozǵalady. Iaǵnı, oıyn balasy oıynshyq jylqyǵa otyryp teledıdar kórse de, oınasa da únemi qozǵalyp fızıkalyq jattyǵýlar oryndaıdy, - deıdi Jeńis Ysqabaı.
Aǵash sheberi endi-endi otyra bastaǵan, beli qataıyp kele jatqan 6-7 aılyq balalarǵa arnap qulynshaq qurastyrdy. Al shybyq syndyryp jylqy etip oınaıtyn 4-5 jastaǵylarǵa taǵy bir tulpar jasady.
Eń bastysy onyń buıymdary ekologıalyq taza zattardan jasalǵan. Jeńis Ysqabaı bul oıynshyqtarymen baıyp ketýdi maqsat etip otyrǵan joq. Ol ár qazaqtyń balasy jylqy qumar bolyp óskenin qalaıdy.
