Almaty oblysynda sybaılas jemqorlyqtyń aldyn alý maqsatynda qurylǵan monıtorıńtik top 2017 jyldy qorytyndylady. Byltyr bul uıym memlekettik organdarǵa ár túrli sala boıynsha 900-den astam usynys jibergen.

 Monıtorıńtik top kómegimen aldaǵy ýaqytta óńirdiń birneshe aýdanynda halyqqa qyzmet kórsetý ortalyqtaryna derbes ǵımarattar salynatyn boldy. Jańa ǵımarattar aýdan turǵyndarynyń qujat rásimdeýin jeńildetip, sybaılas jemqorlyqtyń aldyn alýǵa septigin tıgizbek.

Sondaı-aq biryńǵaı ulttyq testileýge daıyndyq kezinde aqyly qyzmet túrlerin joıý máselesin qolǵa aldy. Sebebi joǵary synyp oqýshylaryn aqyly daıyndaý ata-analardyń narazylyǵyn týdyryp otyr. Óıtkeni basym bóliginiń balasyn synaqqa aqyly daıyndaýǵa múmkindigi kele bermeıdi. Qazirgi tańda tıisti qujattar jınaqtalyp, usynystar oblys ákimi men oblystyq bilim basqarmasyna jiberildi.

Jalpy memlekettik qyzmet ister jáne sybaılas jemqorlyqqa qarsy is- qımyl agenttigi  janynan qurylǵan mundaı toptar halyqtyń memlekettik qyzmetshilerge degen senimin arttyryp, sybaılastyq jemqorlyqqa táýekeldilikti tómendetetin bolady.