Almaty oblysynda jaýyn-shashyn men erigen qar sýy kúre joldar arqyly tasyp, úılerdi basýda. Bir myń adam qaýipsiz jerge kóshirildi.
Almaty oblystyq Tótenshe jaǵdaılar departamentiniń baspasóz qyzmetinen málim etkendeı, 27 aqpan kúni sý basý qaýpine baılanysty Talǵar aýdanynyń Tuzdybastaý aýylynda 250 úıden 1 myń adam evakýasıalandy. Halyqty qaýipsiz jerge kóshirýmen jergilikti atqarýshy organ (25 jumysshy, 7 tehnıka), Tótenshe jaǵdaılar departamenti (17 qyzmetker, 3 tehnıka), «Qazselqorǵanys» memlekettik basqarmasy (4 qyzmetker, 1 tehnıka) jáne aýdandyq İshki ister bólimi (18 qyzmetker, 6 tehnıka) aınalysty. «7 avtobýs jumyldyryldy, Talǵar qalasynda evakýasıalyq pýnktter daıyndaldy (№13 jáne 31 mektepter, Ekonomıkalyq kolej, Medısınalyq kolej). 28 aqpan kúni saǵat 00.45-te evakýasıalyq sharalar aıaqtaldy», - delingen TJD aqparatynda.
Atap ótilgendeı, aýyl turǵyndary týys-týǵandaryna ketti.
Sondaı-aq TJD aqparatyna sáıkes, 27 aqpan kúni respýblıkalyq mańyzy bar 6 kúre jol arqyly sý tasyǵan. Qozǵalys shektelmegen. Qazirgi ýaqytta «Qazaqavtojol» RMK sýdy burý jáne qubyrly ótkelderdi tazalaý jumystaryn júrgizýde.
Atap aıtqanda, sý tasqynynyń saldaryn joıý jumystary Jambyl aýdany, «Almaty-Tashkent» respýblıkalyq mańyzy bar tasjolynyń 134-shaqyrymynda, Eńbekshiqazaq aýdany, «Almaty-Kókpek-Kóktal» respýblıkalyq avtojolynyń 30-shaqyrymynda, Talǵar aýdany, «Almaty-Talǵar» respýblıkalyq avtomobıl jolynyń 64-shaqyrymynda, Qarasaı aýdany, «Almaty-Jandosov» respýblıkalyq tasjolynyń 22, 25 jáne 43-inshi shaqyrym aralyqtarynda júrgizilýde.
Buǵan deıin habarlaǵanymyzdaı, sý tasqynyna baılanysty Jambyl aýdanynda tótenshe jaǵdaı jarıalandy. Almaty oblystyq TJD-dan málim etkendeı, aýdannyń Qaınazar aýylynda tórt kóshedegi 50 úıdi sý aldy.
Sondaı-aq 27 aqpan, keshki saǵat 18:15-tegi jaǵdaı boıynsha Jambyl aýdanynyń Uzynaǵash aýylyndaǵy Baspana kóshesinde 100 aýlany sý basty.
Budan bólek, saǵat 19:32-degi jaǵdaı boıynsha Talǵar aýdany Talǵar qalasynyń Qonaev kóshesinde ornalasqan jer úı tolyǵymen qırady. Zardap shekkender joq. Úıdiń turǵyndary týystaryna ornalastyryldy.
«Sý tasqyny bolǵan jerlerge tótenshe jaǵdaı qyzmetkerleri men tehnıkalary jiberildi», - delingen TJD aqparatynda.
