Maqtaral aýdanynda kóktemgi egis jumystary qyzý qarqynmen júrgizilýde. Qazirge deıin aýdan boıynsha 137959,6 gektar egistik alqaptyń 11425,0 gektary tyrmalanyp, 7327,0 gektary chızeldendi. Ylǵal jabý jumystary tıanaqty atqarylyp, qajetti tehnıka, qural-saımandarmen tolyq qamtamasyz etilgen.

Dıqandar aýa-raıynyń árbir qolaıly sátin tıimdi paıdalana otyryp 997,1 gektarǵa jańa jońyshqa, 931 gektarǵa erte pisetin kókónis, 855,5 gektarǵa qyryqqabat daqylyn ekti. Kóktemgi egiske erte bastan qamdanǵan baqsha ósirýshiler 1723 gektarǵa qarbyz, 3120 gektarǵa qaýyn tuqymyn egip úlgerdi. Úlbir astyna egilgen baqsha daqylyn erterek ósirip, odan mol ónim alýdy maqsat etken dıqandar agrotehnıka talaptaryn muqıat saqtaýǵa kúsh salýda.

Egistik alqaptardy tyrmalaý, chızeldeý jumystary Sh.Dildábekov, Qyzylqum aýyldyq okrýgterinde joǵary qarqynmen júrgizilýde. Dostyq, Sh.Dildábekov aýyldyq okrýgteriniń dıqandary jańa jońyshqa, qarbyz egýde alda keledi. Erte kókónis ósirýde, onyń ishinde qyryqqabat egý boıynsha Atameken, Maqtaaral aýyldyq okrýgteriniń dıqandary kósh bastaýda. Árbir aýyl okrýgterinde jumysshy brıgadalary qurylyp, olar dıqandarmen kelisip, jaldamaly negizde jumys istep keledi. Eńbekaqysy ózara kelisim boıynsha, naqty qolma-qol tólenýde.

Ótken jyldyń osy merzimimen salystyrǵanda jańa jońyshqa egis kólemi 140 gektarǵa, qyryqqabat 131,8 gektarǵa, qarbyz 1248 gektarǵa, qaýyn 1277 gektarǵa artyp otyr. Bul dıqandardyń kókónis, baqsha, mal azyqtanatyn daqyldardy kóbeıtýge erekshe yntaly ekenin baıqatady jáne ekonomıkalyq tıimdiligine baılanysty egistikti ártaraptandyrýdyń da paıdasy orasan zor.

Kúnniń kúrt jylýyna baılanysty sory shaıylǵan alqaptar degdip, tyrmalaý, ylǵal jabý jumystary maqtaly ólkede osylaısha qyzý qarqyn aldy. Negizgi daqyly "aq altyn" bolyp sanalatyn maqtaraldyq sharýalar jerge maqta shıtin sebýge de daıyndyqtaryn jasaýda. Tuqymdyq shıt jetispeýshiligi máselesin boldyrmaý maqsatynda aýdan ákimdiginiń bastamasymen qurylǵan jumysshy top 3000 tonnaǵa jýyq tuqymdyq shıtti daıyndaǵan jáne bul kóktemgi egis maýsymyn tolyqtaı qamtamasyz etedi dep kútilýde.

Aýdanda sýbsıdıalanatyn mıneraldy tyńaıtqyshtardy alý úshin osy jylǵy 1 naýryzdan bastap egov.kz portaly arqyly dıqandardan elektrondyq sıfrlyq qoltańbasymen ótinimder qabyldanyp jatyr. Tyńaıtqyshtardy sýbsıdıalaý máselesine aýyl ákimderi úlken jaýapkershilikpen qarap, ótinim tapsyrýdy jedeldetýi tıis.