Sırıanyń áskerı qaqtyǵys alańdarynda Atyraý oblysynyń 67 balasy bar. Bul týraly Atyraý oblysy din isteri jónindegi basqarma basshysy Qaırolla Qushqalıev málimdedi.

Qaırolla Qushqalıevtiń aıtýynsha, 2011 jyldan beri Sırıaǵa atyraýlyq 54-ke jýyq eresek adamdar attanǵan. Keıbir otbasylylar balalarymen ketti. Sońǵy derekterge sáıkes, qazirgi ýaqytta Sırıanyń qaqtyǵys alańdarynda Atyraý oblysynyń 67 balasy bar. Olardyń ekeýi 18-ge tolǵan, 34-i mektep jasyndaǵylar bolsa, qalǵan 31-i mektep jasyna deıingi balalar.

Din isteri jónindegi basqarma basshysy 2017 jyly arab memleketterine bilim alýǵa attanǵan 10 stýdenttiń elge qaıtarylǵanyn habarlady.

«Byltyr 35 stýdent bolǵan. Olardyń otbasy múshelerimen sóılesip, 10 stýdentti elge qaıtardyq», - dedi Qushqalıev.

QR UQK-nyń dereginshe, 2017 jyly soǵys oshaqtarynan Qazaqstanǵa 63 bala qaıtaryldy.

Qazaqstan elshiligi Sırıada akkredıttelgen konsýlmen birlesip, soǵys aımaǵyndaǵy qazaqstandyq balalardyń sanyn anyqtaý jumystarymen aınalysýda. «Balalardyń naqty sany belgisiz, sebebi soǵys aımaqtaryna attanǵan  Qazaqstan azamattaryn eshkim baqylamaıdy», - dedi QR SİM.