Keshe Belorýs prezıdenti Aleksandr (Batka) Lýkashenko armıa qolbasshylarymen kezdesýi barysynda, áskerı konsepsıanyń ózgerýine baılanysty eldiń beıbitshiligin, shekaranyń tutastyǵyn saqtap qalý úshin, Reseıdiń tosyn shabýylynan qorǵaný úshin NATO-men birigýi múmkin ekenin aıtty.
Reseı Federasıasy ózderiniń baıyrǵy kórshileri - Ýkraına memleketiniń shekaralyq tutastyǵyn buzyp, berekesin alǵanyn mysalyǵa ala otyryp, Belorýs Batkasy dál sol senarıdiń ózderinde de qaıtalanýy yqtımal ekenin jetkizdi.
"Aldymyzda ash aıýdaı aqyryp turǵan Reseı Federasıasynyń qıturqy ári eki júzdi saıasatynyń saldaryna qalaıda daıyn bolýymyz kerek degen maqsat, mindet tur. Qudaı betin ári qylsyn! Eger Ýkraına terıtorıasymen bolǵan oqıǵa sújeti bizge de aınalyp soǵatyn bolsa, jaǵdaı múldem qıyndap ketedi. Reseı shynshyl saıasat ustanyp otyrǵan joq. Aınalamyzdaǵy saıası turaqsyzdyqtar, álemdik daǵdarys, klandar arasyndaǵy teketires. Bunyń bári jáıdan-jáı bolyp jatqan joq. Erteń, erteń bolmasa búrsúgúni Reseıdiń kózi bizge de túsedi. Qazirgi, alasapyran kezeńde baýyrlas eki eldiń jaýlasyp, kesirinen beıbit turǵyndardyń qaza taýyp jatqanyn kóre tura kóz juma almaımyz. Máseleni beıbit jolmen sheshýdi Mınsk ózine mindettep aldy. Qalaı bolǵanda da biz barlyq jaǵdaıǵa daıyn bolýymyz kerek",-dedi Lýkashenko.
Bul Batkanyń baıaǵydan beri aıtyp kele jatqan jattandy sózderiniń biri bolyp kóringenimen, bul joly ol buryn ózi "Jalmaýyz-Monstr" dep baǵalaǵan NATO-men konstrýktıvti dıalog qurýǵa nıetti jáne árqashan daıyn ekenin aıtty.
Sonda, NATO-nyń qoltyǵyna búrkengen Belorýsıa Reseımen araqatynasyn múlde úze me? Joq, eki el arasyndaǵy baılanys burynǵydaı bolyp qala bermek. Tek Sasha Lýkashenko shekarasynyń bútindigin, eliniń tutastyǵyn oılaǵannan NATO-dan kómek suramaqshy kórinedi.
"Muny túsindirýdiń qajeti joq sıaqty. Lýkashenko árdaıym, dıalogqa ashyq ekenin aıtyp júretin",-deıdi belorýstik saıasatker Aleksandr Fedýta.
"Sońǵy kezeńderde Evrazıalyq jáne Kedendik odaqtaǵy Belorýsıanyń taýar aınalymy Reseı jáne Qazaqstanmen salystyrǵanda eki satyǵa joǵary tur. Biraq, bul kórsetkishter bizdiń Brússel jáne Vashıngtonmen baılanys ornatýymyzǵa kedergi keltire almaıdy",-dedi A.Lýkashenko.
"Lýkashenko qazir ózine qysym Brússel nemese Berlınnen emes, Máskeýden keletinin jaqsy túsinedi. Muny ashyq aıta almaǵanymen, NATO-men kelisimge kelýi múnyń aıqyn kórinisi. Ýkraına men Reseı arasynyń búlinýinen Lýkashenko esh utylǵan joq. Kerisinshe osy bir kezeńde ózine upaı jınap ta úlgerdi. Eń áýeli Belorýsıa Batyspen baılanysyn nyǵaıtty. Munyń dáleli sońǵy kezderi Nemis kansleri Angela Merkel men Fransýz prezıdenti Fransýa Ollandtyń Mınskge saparynyń jıileýi",-deıdi Sankt-Peterbordaǵy Eýropa ýnıversıtetiniń porfessory Grıgorıı Golosov.
Ýkraına daǵdarysy aldynda Reseıdiń Batys elderi arasynda bedeli de jaqsy edi, sózin de ótkize alatyn. Qazir jaǵdaı 360 gradýsqa keri aınalǵan. Endi Batys resmı Mınski men Astananyń sózin tyńdaıdy, -deıdi sarapshylar.
2013 jyly NATO-nyń shtab-bazasynda Belorýs áskerlerimen birlesip oqý-jattyǵý sharalaryn da ótkizgen. Bul birinshi ret emes. Baıqaǵanymyzdaı, Belorýsıanyń bul usynysyn NATO qabyldaıtynyn da aıtqan.
Belorýsıa NATO-ǵa shekarasyn buryn da ashyp bergen. 2004 jyly NATO áýede bombalaýshy ushaqtaryn Belorýsıa aımaǵy arqyly tasymaldaǵan. 2013 jyly qurlyq áskerı, bronı tehnıkalaryn tasymaldaý tranzıtin ashyp berý týraly kelisimge qol qoıylǵan edi. Al 2014 jyly Belorýsıa áskerıleri NATO-nyń bazasynda oqý-jattyǵý sharalaryna qatysyp, kásibılikterin shyńdaǵan bolatyn.
