Atyraýda 2016 jylǵy sáýirde ótken «jer sherýine» qatysqannan keıin bes jylǵa sottalǵan jergilikti belsendi Talǵat Aıan bostandyqqa shyǵatyn boldy, - dep habarlaıdy Qamshy.kz aqparat agenttigi.
Bul jaıynda Talǵat Aıannyń ákesi ári advokaty Tólepqalı Aıanov habarlady. Onyń sózinshe, sáýirdiń 13-inde Aqtóbe qalalyq №2 soty qazirgi kezde osy qaladaǵy K-168/2 kolonıasynda qamaýda otyrǵan Talǵat Aıannyń isi boıynsha naýryzdyń 25-inde túsken ótinishti qaraǵan.
— Sýdıa Teńizbaı Aldanov Talǵattyń jazasynyń qalǵan bóligin bas bostandyǵyn shekteý túrine ózgertý týraly sheshim qabyldady. Prokýror qarsylyq bildirgen joq, sot sheshimi sáýirdiń 29-ynda kúshine enedi, - dedi Tólepqalı Aıanov.
2016 jylǵy 24 sáýirde Atyraýdaǵy Isataı men Mahambet alanyńa júzdegen adam jınalǵan. Olardyń «jerdi sheteldikterge jalǵa bermeý jáne satpaý» týraly talabyn oblys ákimi Nurlan Noǵaev Aqordaǵa jetkizýge ýáde etken.
Atyraýdaǵy mıtıńiden keıin kóp uzamaı belsendiler Maks Boqaev pen Talǵat Aıan qamaýǵa alynyp, ekeýiniń ústinen Qylmystyq kodekstiń birneshe baby boıynsha is qozǵaldy. 2016 jyly qarashanyń 28-i kúni Atyraýda sýdıa Gúlnár Dáýleshova azamattyq belsendi Maks Boqaev pen Talǵat Aıanǵa úkim shyǵardy.
Sot belsendilerdi «arazdyq qozdyrdy», «jalǵan aqparat taratty» jáne «mıtıń ótkizý tárbitin buzdy» dep tanyp, árqaısysyn bes jylǵa bas bostandyqtarynan aıyrdy. Úkimde olardyń úsh jylǵa deıin qoǵamdyq jumyspen aınalysýyna tyıym salynǵany da kórsetilgen.
Talǵat Aıannyń advokaty Tólepqalı Aıanovtyń úkimge narazylyq bildirip Qazaqstandaǵy sot ınstanısálarynyń barlyǵyna jazǵan aryzdarynyń eshbiri qanaǵattandyrylmady.
Týystary men quqyq qorǵaýshylar sottalǵan belsendilerdi Qazaqstan zańyna sáıkes turǵylyqty jeri boıynsha jaza óteýge jiberedi dep kútken edi. Alaıda Boqaev pen Aıandy áýeli Aqtóbedegi túrmege jiberip, keıin Almaty arqyly etappen Soltústik Qazaqstan oblysyndaǵy ES-164/3 qamaý mekemesine jóneltken. Advokattary sottalǵan belsendilerdi qoldanystaǵy zańǵa sáıkes jazasyn óteýge turǵylyqty aımaqqa jiberýdi surap birneshe ret shaǵym bergen.
2017 jylǵy tamyzda Talǵat Aıandy Aqtóbedegi K-168/2 kolonıasyna aýystyryp, Maks Boqaevty Petropavldaǵy túrmede qaldyrǵan edi. Tutqyn Boqaevty jaqynda Pavlodarǵa "emdeýge" jibergeni týraly habarlandy.
