Búgingideı jahandyq daǵdarystardyń aldynda turǵan almaǵaıyp kezeńde damýdyń serpindi jolyn tańdaǵan memleketimizdiń jańasha sıpatyn qalyptastyrýǵa árbir qazaqstandyq múddeli ekeni ras. Memlekettik saıası júıelerdi jetildirý úshin qoǵamdy demokratıalandyryp, ekonomıkalyq jáne saıası reformalardy júzege asyrýǵa - eldegi saıası partıalardyń qyzmeti mańyzdy ról atqaratynyn taǵy bilemiz.  Osy oraıda, elimizdegi jetekshi, bıleýshi partıa sanalatyn - Nur Otan HDP-nyń sońǵy kezeńderdegi elimizdegi jáne kórshiles  elderdegi shıelenisti máselelerge qatysty ún-túnsiz otyrǵanyna qarap kóbimizdiń kókeıimizde kúdikti saýaldar týyndaıdy.

Endi, sol Bas partıanyń ún qatýyn kútken birneshe máseleni sanamalap kóreıikshi.

1. 2014 jyldyń aqpanynda teńge kúrt qunsyzdandy. AQSH aqshasynyń qazaq volútasyna shaqqandaǵy baǵamy 185 teńgege teńeldi. Sodan sál ǵana buryn Bas Bankır Kelimbetov "Eshqandaı teńgeniń qunsyzdanýy bolmaıdy" dep jurtty sendirgen bolatyn.
2. Qazaq bıligi múddeli bolǵan «Eýrazıalyq odaq» týraly qarapaıym jurtshylyq pikiri ár alýan boldy. Tipti «Táýelsizdigimizden aıyrylamyz» dep te dabyl qaqty.
3. Al Reseıdiń senatorlary men beldi tulǵalary(Jrınovskıı bastaǵan) «Qazaq elin qaıtaryp alýymyz kerek. Ol Reseıge táýeldi» dep kókidi.
4. Elimizdegi eń tanymal basylymdardyń biri «Juldyzdar otbasy» jýrnalynyń Bas redaktory Jarylqap Qalybaı «Gıtlerdi – ǵasyr qasireti» dep jazǵany úshin fashızmdi nasıaǵattaǵan bolyp shyǵa keldi. Súıegi qýrap qalǵan Gıtler úshin Jarylqaptyń basy daýdan arylǵan joq.
5. Ótken jyldyń 22 qazanynda Sırıaǵa baryp, soǵysyp júrgen qazaqstandyq jıhadshylar týraly vıdeo-rolık áleýmettik jeliler arqyly Qazaq elin dúr silkindirdi. Tipti olardyń arasynda besikten beli shyqpaǵan sábılerde júr.
6. Kórshiles Ýkraına elinde bolyp jatqan jaǵdaılarǵa bizdiń odaqtasymyz Reseı tikeleı qatysyp otyr.
7. 2014 jyldyń 2 qyrkúıeginde «Eýrazıalyq odaq» aıasyndaǵy eń basty serigimiz Reseıdiń Prezıdenti Pýtın myrza: «Qazaqta memleket bolmaǵan» dep orys jastarynan súıinshi suraǵandaı boldy.
8. 2014 jyly Sheteldegi qandastar máselesi – eń bir shyrqaý shegine jetti. Aldy kelgen elderine qaıtty. Qalǵandary kóshi-qonnyń jaıyn aıtyp, zar jylady. Elbasy Atajurtqa oralatyn qazaqa eshqandaı tosqaýyl qoıylmasyn dep kesip aıtty. Parlament Zań qabyldaımyz degennen áli tanǵan joq.

9. 2014 jyldyń 31 jeltoqsan kúni Almaty oblysy, Uıǵyr aýdany, Shonjy aýylynyń ortalyq alańynda qazaq jáne uıǵyr azamattary arasynda kelispeýshilikter boldy. Tipti búkil el azamattaryna telefon arqyly úndeý jarıalandy.

10. Mine jaqynda ǵana Saryaǵashta bolǵan jańjal búkil Qazaq elin taǵy da shýlatty.

Qarap otyrsaq, Táýelsiz Qazaqstanǵa tikeleı qatysty shekaranyń ishi-syrtynda bolyp jatqan osyndaı máselelerge «Nur Otan» partıasynyń ún qatqanyn estidińizder me? Tym qurysa «tunshyqqan» aqparat pen ósek-aıańnyń ortasynda dúrlikken jurtqa basý aıtqanyn da kórgen joqpyz.

Al sonda «Nur Otan» partıasy eshteńe istemegen be» dep ótken jylǵa kóz salsań, qaptaǵan is-sharalarǵa qaryq bolasyń. Elbasy joldaýyn nasıhattaý men qatyp qalǵan saıası jıyndardan basqa birden eske túsetini – aıtys. Onyń sońy ulttyq qundylyqty mazaqqa aınaldyrǵan «Shoý-aıtyspen» biraq toqtady. Ekinshisi – KVN.  Úshinshisi – asyq oıyny. Tórtinshisi – aýdaryspaq.... qoıshy osylaı kete beredi. Qyzyqqa batasyń da jatasyń.

Al myna jaqta jurt ózin mazalaǵan suraqtarǵa Bas partıadan jaýap kútedi, ne der eken, ne ister eken deıdi? Lám-mım!

Haziret Ábdilda