Jumys sapary barysynda Almaty ákimi Baýyrjan Baıbek Abaı, Abylaı han, Jeltoqsan, Nazarbaev dańǵyldaryn jáne basqalaryn aralap kórdi. Qalanyń tıisti basqarmalary men komýnaldyq qyzmetine burynnan bar sýburqaqtardy qalpyna keltirýdi, júrginshi aımaǵy men trotýarlardy ulǵaıtýdy, nysandar janyndaǵy jasyl jelekti túzeýdi, tarıhı ǵımarattardyń syrtyna ejelgi kelbetin qaıtarýdy tapsyrdy.

«Qalanyń tarıhı ortalyǵyn jańartý - taıaý arada atqarylatyn úlken jumystardyń basy ǵana. Qazir biz tógilgen asfáltty, júrý aımaǵyndaǵy túrli qurylystardy, kólik arasynan amalsyz ótetin jandardy, ózi ádemi bolǵanymen syrtyna túsiniksiz nárseler japsyrylǵan tarıhı ǵımarattardy kórýdemiz. Ár kvartal, árbir kóshe jóndelip, retke keltiriledi. Almatynyń burynǵy tartymdylyǵyn qaıtaratyn kez jetti», - dedi Baýyrjan Baıbek.

Almaty ákimi jumys sapary barysynda kúrdeli jóndeýden ótetin birqatar jer asty ótpeli joldardy da kórdi. Megapolıs basshysy bular jóndeletin kezde burylystarda jaıaý júrginshiler úshin qaýipsiz qozǵalysty qamtamasyz etýdi tapsyrdy.

Jalpy, bıylǵy jyly qalanyń tarıhı ortalyǵyn jańartý odan ári jalǵasady. Ǵımarattardyń syrty jańarady, júrginshi aımaqtary keńeıedi, kirý toptary biryńǵaı arhıtektýralyq sıpat alady. Joba Memleket basshysynyń Joldaýy aıasyndaǵy megapolısti modernızasıalaý jáne odan ári ekonomıkalyq damytýǵa qatysty jasalǵan «Almatyny damytýdyń 50 draıveriniń» biri bolyp tabylady.

Eske salsaq, buryndary Baýyrjan Baıbek trotýarlardyń boıynda túrli qurylystar júrgizip, jaıaý júrginshilerge kóp kedergi keltiretinderdi anyqtaý jóninde tapsyrma bergen edi. Stıhıaly turaqtardyń aldyn alý, júrginshilerdiń qaýipsizdigin arttyrý úshin kóshe qozǵalysy qysqaryp, trotýarlar abattandyrylady.

Almatyda 2018 jyly uzyndyǵy 155 shaqyrym bolatyn 157 kóshe jóndeledi, Maqataev, Baıtursynov jáne Jarokov kóshelerindegi tramvaı joldary alynady.Jol jıegin jóndeý barysynda trotýarlar abttandyrylady, aryq naýalary almastyrylady, qoldanylmaıtyn konstrýksıalar joıylady, buǵan qosa turaq qaltalary qıǵashtanady.