Búgin QR Din isteri jáne azamattyq qoǵam mınıstri Darhan Káletaev jáne Astana qalasynyń ákimi Áset Isekeshev Astanadaǵy Áýlıe Kırıll men Mefodıı atyndaǵy Rýhanı-mádenı ortalyqta bolyp, Qazaqstandaǵy Orys Pravoslavıe shirkeýiniń Mıtropolıt okrýginiń basshysy, Astanalyq jáne Qazaqstandyq mıtrıpolıt Aleksandrmen kezdesti, dep jazady Qamshy.kz aqparat agenttigi.

Sapar aıasynda qonaqtar Ýspen Kafedraldy Soborynyń jumysymen tanysyp, rýhanı-mádenı ortalyq ǵımaratyn jáne shirkeý murajaıyn aralady.

Kezdesý barysynda Darhan Káletaev Orys Pravoslavıe shirkeýiniń qoǵamdaǵy turaqtylyq pen tynyshtyqty saqtaýǵa, beıbitshilik pen kelisimdi nyǵaıtýǵa qosqan úlesin atap ótti.

«Pravoslavıe shirkeýi izgilikti, qaıyrymdylyqty, dástúrli qundylyqtardy nasıhattaýda memlekettiń senimdi seriktesi bolyp tabylady. Ásirese Pravoslavıe shirkeýiniń dinaralyq jáne memlekettik-konfessıalyq suhbatqa belsendi qatysýy aıryqsha mańyzǵa ıe», - dedi Darhan Káletaev.

Mınıstr kezdesý barysynda Orys Pravoslavıe Shirkeýiniń rýhanı qundylyqtardy saqtaýǵa jáne damytýǵa baǵyttalǵan usynystaryn qoldaýǵa daıyn ekendigin bildirdi.

Mıtropolıt Aleksandr óz kezeginde vedomstvo basshylaryna shirkeýdiń tynys-tirshiligi týraly aıtyp, Mıtropolıt okrýginiń qyzmeti memleket pen qoǵam tarapynan árdaıym qoldaý tabytynyna senim bildirdi. 

Kezdesýde Qazaqstandaǵy Pravoslavıe dinine qatysty keń aýqymdy máseleler boıynsha pikir almasý bolyp ótti. Onyń qorytyndysy boıynsha taraptar syndarly yntymaqtastyqty jalǵastyrýǵa ýaǵdalasty.