Uıyqtap qalyppyn. Kerlip, sozylyp, «Aeo!» dep esineı bergenim sol, stol ústindegi áıelimniń tildeı qaǵazǵa jazyp ketken habarlamasyna kózim túsip kettti de, bireý búıirimnen yńq etkizip bir urǵandaı, qarsy aldymda alpamsadaı bireý taǵy urǵaly turǵandaı, tilim baılanyp, kózimniń aldy laılanyp, sylq etip otyra kettim.
– Qurydym, qurydym, qanshyǵy ólgen qasqyrdaı ulydym, ulydym! –dedim men.
Aqsańdaı basyp, sheshem keldi.
– Ne boldy balam?
– Oıbaı, apa, kelinińiz Sırıaǵa qashyp ketipti!
– Kótek! Tórkini Sırıada emes edi ǵoı?
– Mine, jazyp ketipti: «Men Sırıaǵa kettim! Sırıadan kelgenshe saý bol!» depti.
Apam ábdiresin ashyp, kıine bastady. Kamzolyn kıip, aq jaýlyǵyn tartyp...
– Oı, apa, qaıda?
– Sırıaǵa.
– Onda ne bar sizge?
– Kelinimdi ertip kelemin!
– Sırıa taltaısaq, tabanymyz tıetin jer emes qoı, ol soǵys bolyp jatqan memleket! Sodyrlar «seks jıhad» degendi oılap shyǵarypty! Kelinińiz sodyrlarǵa baıǵa tıýge ketti!
– Ne deıdi? Seni tastap, jaman yrym bastap... –degen apam jylaı bastady.
– Apa, ásire dinshilder aldap alyp ketti! Negizi, kem degende on baıǵa tıetin boldy! Birinshi baıy bolǵanyma shúkir! Olar talaq aıtyp, bir–birine syılyqqa bere salady eken....
– Sırıadan qaıtyp kelse, qatynsyz ótseń de, alma!
– Qazir qazaq qyzdarynyń kóbi Sırıada seks jıhad bolyp, qorlyqta júr...
Osy kezde kórshiniń áıeli kirdi de:
– Apa, Qanshaıym kerek edi, –dedi.
– Sırıaǵa ketip qaldy... –dedi apam súlesoq.
– Ketkeni nesi? Keshe menen myń teńge qaryz alyp edi...
– Sırıadan kelgen soń beredi de... –dedim men.
– Shyn aıtyp tursyńdar ma?
– Má, saýatyń bar shyǵar, oqy!
Kórshi áıel oqydy da, kózderin jypylyqtatty.
– Jyndy ma myna qatyn?
– Halal jyndy...
– Aǵaı, sizge obal bolypty...
– Ia, jesir erkekpin...
– Endi ne isteısiz?
– Saǵan úılenemin.
– Qoıyńyzshy aǵaı... Apamnan uıatty...
– Apań ań –tań. Kúıeýiń byltyr ólgen. Seni alamyn! –dedim yzalanyp.
– Men Sırıaǵa ketpeımin... –dep syzyla qaldy kórshi kelinshek. Bir kezde áıelim Qanshaıym kirip keldi.
– Áı, qaıda júrsiń? Sırıaǵa keteminiń ne? –dep dúrse qoıa berdim. Apam ornynan turyp, kelinin qushaqtaı aldy. Jylap–syqtap. Sóıtsek, Sırıaǵa emes, «Sıyrǵa kettim!» dep jazǵan eken ǵoı, saýatsyz! Qate jazypty! Sıyrymyz qoradan shyǵyp ketip, sony izdep ketipti! Sırıasy qurysyn! Qara qaıystaı qatenem meniń!
Muhtar Sherimniń feısbýk paraqshasynan alynǵan
