Óner deıtin alamanda qashanda aldyna jan salmaıtyn, jolynda kezdesken kedergilerden kidirmeı ótetin qaısar minezdi qazaqtyń daryndy qyzdary az emes. «Ózin ónerden tapqan, ónerden ómir tapqan» Aıgúl Imanbaevanyń boıyndaǵy daryndy bylaı qoıǵanda onyń er adamǵa bergisiz ór minezin, tabandylyǵyn, eńbekqorlyǵyn aıtpaý múmkin emes. Táýligine 20 saǵat jumys istep, 4 saǵat uıyqtaıtyn Aıgúldiń talmaı eńbek etýiniń syry nede? Efırde de, sahnada da júzi jarqyrap turatyn Aıgúl shynaıy baqytty ma? Osy saýaldy Aıgúldiń ózinen surap kórgende...
Kúni keshe «A.I» teatry óziniń V maýsymyn «Temir qatyn» komedıalyq qoıylymymen ashty. Talaıdan beri teatr sahnasynda kórermenmen qaýyshýǵa múmkindigi bolmaı ketken Aıgúl Imanbaevanyń teatry kópshilik saǵynyp qalsa kerek, zalda bos oryn bolmady.
Esterińizde bolsa «A.I» teatry «Temir qatyn» komedıasynyń premerasyn osydan birneshe jyl buryn qoıǵan edi. Ózbek dramatýrgi Sharaf Boshbekovtyń «Temir qatyn» qoıylymynda teatr akterleri Aıgúl Imanbaevanyń, Qadyrǵazy Qýandyqov, Juldyzbek Jumanbaıdyń, Áset Imanǵalıevtiń, Gúljamal Qazaqbaevanyń óz rólderin sheber oınaǵandyǵyn BAQ ókilderi jarysa jazǵan bolatyn. Kórermen árqashanda Aıgúlden erekshe jańalyq kútedi. Aıgúl de óziniń kórermenin árdaıym jańalyǵymen tańǵaldyrýdan jalyqqan emes. Alǵash «A.I» teatry shymyldyǵyn Jan Anýıdiń «Medeıa» spektaklimen ashqany da esimizde. Belgili Rejıser Qýandyq Qasymovtyń rejıserlyǵymen qoıylǵan «Medeıa» spektakli sońǵy eki jylda birneshe halyqaralyq baıqaýlarda bas júldeni ıelendi. Qanjyǵalary maılanǵan teatr ujymy aldaǵy ýaqytta da úlken halyqaralyq baıqaýlarda baq synaýdy josparlap otyr. Naýryz aıynda «A.I» teatry Dýlat Isabekovtyń «Ápke» spektaklin qoımaq. Búginde teatr ujymy premeraǵa qyzý daıyndalyp jatyr. Aıgúl Imanbaeva teatr sahnasynda óziniń bolmysyn ashatyn, oń jambasyna keletin ról oınaýdy armandaıtynyn jıi aıtady. «Ápke» qoıylymynda basty róldi oınaıtyn Aıgúl Imanbaevanyń «Ápkesi» sátti shyǵatynyna kúmánimiz joq.
Ótken jyldyń sońynda Aıgúl Imanbaeva Astana qalasynda «Sen ǵana...» dep atalatyn jeke konsertin berdi. Bul konsert taıaýda telearnalardan kórsetildi. Óner ıesiniń balalyq shaǵynan búgingi kúnine deıin qamtylǵan shyǵarmashylyq keshte kórermen Aıgúldiń án álemine birge saıahat jasady, ádemi án, áserli poezıa, kórkem sóz tyńdap qaıtty.
youtube.com
«A.I» teatryn bir ózi súırep júrgen Aıgúl shoý-bızneste ataq-abyroıdan kende emes. Efırde kameraǵa erkelep, sanqyrly obrazda kórinetin Aıgúl bolashaqta «Sultan Súleımen» serıalyndaǵy Húrem sultandaı keıipkerdiń rólin oınaýdy armandaıdy. Armanyn maqsatqa aınaldyra biletin, maqsatyn júzege asyra biletin aktrısa bul armanyna da jetedi...
youtube.com
Aıgúldiń kún demeı, tún demeı atqaryp júrgen eńbegin sheksiz tize berýge bolady. Televıdenıedegi túsirilimder, teatrdaǵy úzdiksiz daıyndyqtardan sharshamaıtyn Aıgúl ómirindegi eń qymbat jandar anasy men balasyna kóńil bólýge de ýaqyt tabady. Osyndaı kúndelikti sansyz tirlikten aktrısa óziniń jeke ómirine ýaqyt taba almaı júrgendeı.
Óziniń qurbysy belgili prodúser Baıan Esentaeva Aıgúldi «gıpertalant ıesi» dep baǵa bergen edi. Endeshe osyndaı gıpertalantty jan ómirdegi úlken baqytqa laıyq ekeni daýsyz. Buǵan Aıgúldiń ózi ne deıdi?
– Ómirdiń zańdylyǵy bolar, ómirde áıeldiń bári ózinshe aktrısa. Ókpelesek te, ótirik kúlip, ózegimizdi ókinish órtese de, ózimizdi baqytty etip kórsetýge tyrysamyz. Al ómirde qandaı aktrısasyz, baqyttysyz ba?
– Men ómirde aktrısa bola almaıdy ekem, ózimdi-ózim aldap ómir súre almaımyn. Osy ýaqytqa deıin ómirde qıly-qıly belesterden óttim. Sondaǵy túıgenim, adam úshin eń úlken baqyt – jannyń tynyshtyǵy eken. Júrekte kek saqtamaı, keshire bilý baqyt, júregińniń qalaýyn tyńdap, der kezinde sheshim qabyldaı bilý de baqyt. Ózderińiz bilesizder, ákem ekeýmizdiń aramyzdaǵy qarym-qatynasty jýrnalıser asyra siltep kórsetip, túrli alypqashpa áńgimelerdi san-saqqa júgirtti. Biraq men buǵan da sabyrlylyqpen qaraýǵa tyrystym. Ótken ómirime, taǵdyryma, eshkimge ókpem joq. Eger óner adamy ómirde baqytsyz bolsa, ol sahnada, efırde kórermendi aldaıdy. Keıde baqytty bolý úshin óz taǵdyryńa qarsy shyǵýǵa da týra keledi. Men de óz taǵdyryna qarsy baǵytta júrgenderdiń birimin. Eger men olaı etpesem, baqytsyz áıelderdiń biri bolar edim. Ózińiz aıtqandaı, baqytty kóringisi keletin áıeldiń bári birdeı baqytty emes. Óıtkeni ómir tek baqyttan ǵana turmaıdy. Eń bastysy, baqytty sátterimiz kóp bolsyn! Jurttyń bári Aıgúl nege jalǵyz júr dep oılaýy múmkin. Biraq maǵan dál qazir balam erjetken shaqta bireýge ǵashyqpyn, jigitim bar degen sózder jaraspaıdy da. Sondyqtan júregime jol tapqan adam týraly eshteńe aıta almaımyn. "Alash aınasy"
