«Búkilqazaqstandyq orman otyrǵyzý kúni» aksıasy kúni Batys Qazaqstan oblysynyń Aqjaıyq aýdanynda «Búldirshinder» saıabaǵy boı kóterdi. Munda aldaǵy qyrkúıekte mektep qabyrǵasyn attaǵaly otyrǵan «Aqbota», «Bóbek», «Aıana», «Jibek» balabaqshalarynyń, Chapaev №1 orta mektebindegi «Balapan» shaǵyn ortalyǵynyń balǵyndary ózderiniń ata-analarymen, oqytýshylarymen birge tal ekti. Turǵyndar, aýyldaǵy ardager ustazdar qatysqan saltanatta aýdan ákimi Ádil Jolamanov quttyqtaý sóz sóıledi.

– Jyl ótken saıyn baqtyń aýmaǵy keńeıip, ásirese bizdiń sábılerimizdiń súıikti ornyna aınalady dep kútilýde. Toǵyz joldyń torabyndaǵy aýdanymyz ortalyǵynda barǵan saıyn saıabaqtar, jasyl jelek molaıyp keledi. Munyń barlyǵyn saqtap, jas urpaqty týǵan jerdi aıalaýǵa baýlýymyz kerek,- dedi ol.

Ata-analar atynan Gúlnár Saǵadıeva sóz sóılep, balalar úshin osyndaı oryndy jasaqtaýshylardyń bárine alǵysyn arnady. Kólemi 0.8 ga. aýmaqty alyp jatqan saıabaqqa bul kúni alǵashqy 114 túp aqqaıyń otyrǵyzyldy.

Aýdan kásipkerleri «Týǵan jer» baǵdarlamasy aıasynda saıabaq salý, aýyldy abattandyrý, sonymen qatar aǵash otyrǵyzýǵa da belsene qatysýda.