Ótken aptanyń sońynda Adılám Ýshýrova atty qoldanýshynyń atynan qazaqtardyń ar-namysyna tıetin pikir jazylǵan skrınshot jelide tarap ketken edi. Bútin bir ultty "mambetter" dep kemsitken, "senderdi taýǵa qýyp jiberip, maldyń tezegin jegizý kerek" degen sózder qoǵamda qatty talqylandy.

Qamshy.kz aqparat agenttigi quzyrly oryndardan istiń anyq-qanyǵyna jetýdi talap etken edi.

Búgin Facebook áleýmettik jelisinde ózin Adılám Ýshýrova dep tanystyrǵan adam vıdeoúndeý jasap, elge mán-jaıdy túsindirdi. Jylamsyrap otyryp sóılegen sózinde Adılám Ýshýrova ol pikirdi ózi jazbaǵanyn, belgisiz bireý akkaýntyn buzyp kirgenin aıtady.

«Men, Ýshýrova Adılám. Qazaqstan azamattary! Meni túsinýlerińizdi suraımyn! Men ol pikirdi jazǵan joqpyn. Bireý meniń akkaýntymdy buzyp kirip, joqtan ózgeni jazypty. Ony men jazǵan joqpyn. Men qalaı jazamyn? Kúıeý balam – qazaq, jeńgem, qudasham – bári qazaq. Qazaqtardyń arasynda jumys isteımin.

Men egde jastaǵy áıelmin. Sizder qalaısha sony men jazdy dep oılaısyzdar? Maǵan til tıgizip, qorqytyp, fotosýretterimdi jan-jaqqa tarattyńyzdar. Biraq ony men istemedim. Nemerelerim qazaqsha sóıleıdi. Halaıyq, meni keshirińizder! Men qalaı sizderge aqtala alamyn? Týystarym men dostarym da maǵan: "Sen ne jazǵansyń?", — dep jatyr. Ondaı byljyraqty jazatyn men sonshalyqty aqymaqpyn ba? Eger shynymen jazǵym kelse, birinshi kezekte týystarymnyń – nemerelerimniń, áke-sheshemniń sýretin óshirer edim.

Qazaqstan halqy! Bul – meniń isim emes. Bireý akkaýntymdy buzǵan. Qalaı túsinseńizder, olaı túsinińizder. Sony jazbaǵanym úshin meni keshirińizder», — dedi Adılám Ýshýrova.