Almatyda «Almatyelektrotrans» balansynda qalǵan vagondar jaqynda bássaýdada satyldy.
Dál osy 1002, 1010 jáne 1014 nómirli, tehnıkalyq turǵydan eskirgen vagondar 2015 jyly jol apatyna sebep bolǵan edi. Jol oqıǵasynan soń qala bıligi tramvaı qozǵalysyn toqtatý týraly sheshim qabyldaǵan bolatyn.
Elektrondy saýda alańynda kórsetilgen málimetke sáıkes, 1983-1985 jyldary shyqqan KT4Dt markili vagondar bólshektelip, metal retinde bássaýdada satyldy. Lottyń bastapqy baǵasy 1 751 000 teńge bolsa, saýdanyń sońyna taman eń joǵarǵy baǵa usynǵan zańdy tulǵaǵa 2 330 581 teńgege satyldy. Kepildik somasy 262 myń teńge boldy.
Aıta ketý kerek, 19-qańtarda 1983-1985 jylǵy paıdalanýǵa áli de jaramdy KT4Dt markili 13 vagon satylǵan bolatyn. Kólikterdiń bastapqy baǵasy 118 508 599 teńgege baǵalandy. Qazir atalǵan vagondar aqshyl kók túske boıalyp, Óskemenge jiberilgeli jatyr.
Aıta ketý kerek, «Ertis» áleýmettik-kásipkerlik korporasıasy «Óskemen tramvaı parkin» satyp alǵan bolatyn.
Keshen «Bank Sentr Kredıt» AQ aldyndaǵy boryshy kóp bolǵandyqtan 20-naýryzda 444 mln teńgege satylǵan bolatyn. «Ertis» ÁKK biraz ınvestısıa salyp, Óskemendegi tramvaı qozǵalysyna qaıta jan bitirmek. Sonymen qatar, munyń aldynda habarlaǵanymyzdaı, 2017 jyly alynǵan tramvaı relsteri de aýksıonda satyldy.
«Almatyelektrotrans» basshysy Rızvan Sınaevtyń habarlaǵanyndaı, eski relster «Kazferrostal» JSHS 8 214 573 teńgege ótkizildi, «Metalokomplekt» JSHS qara metalǵa 115 676 418 teńgege ótkizildi. Qazirgi tańda Almatyda Maqataev, Baıtursynov, Jarokov kóshelerinde tramvaı relsteri alynyp jatyr.
