Almatyda qala qazynasynan halyqtyń áleýmettik qajettiligine qosymsha qarajat bólindi. 65 mıllıard teńgege jýyq qarjy búdjetti ońtaılandyryp, salyq túsiminiń artýy arqasynda berilip otyr. Máslıhatta 2018 jylǵa arnalǵan búdjet Elbasynyń joldaýy men 5 áleýmettik bastamalaryn eskere otyryp naqtylandy. Bıyl Jeńis kúni qarsańynda Uly Otan soǵysy ardagerlerine 250 myń teńgeden beriledi. Sondaı-aq «Almaty jastary» baǵdarlamasyna 2 mıllıard teńge bólinbek.

Bıyl Almatyda 3 myńǵa jýyq balany qamtıtyn jeke balabaqshalarda memlekettik tapsyrysty ulǵaıtýǵa 850 mln teńge bólindi. Al az qamtylǵan otbasylardyń 4 myńnan astam balalary jazǵy demalystarǵa jiberiledi. Uly Otan soǵysy ardagerlerine aı saıyn kórsetiletin komýnaldyq qyzmet aqysyn tóleý 5,5-ten 6,5 aılyqtyq eseptik kórsetkishke jetti. Iaǵnı, ádette 13 myń 227 teńge bólinse, endi bul 15 myń 632 teńgege ósti. Sondaı-aq áleýmettik jaǵynan az qamtylǵan azamattarǵa ortalyq tarmaqtan jeke úılerine deıin gaz tartý shyǵynyn ákimdik 100 paıyz óteıdi. Oǵan qosa, jyl aıaǵyna deıin 3 myńnan astam adam «Eńbekpen qamtý ónimdiligi» baǵdarlamasy aıasynda jumysqa tartylady. Basymdyq bul joly da týrızmge berilip otyr.

«Aǵymdaǵy jyly Almatyda týrızmniń barlyq salasyn damytý úshin keshendi jospar ázirlendi. Medısına, sport, taý-shańǵy kýrorty, eko jáne etno týrızmdi ilgeriletý kerek. Halyqarylyq deńgeıdegi 50 is-sharany ótkizýdi josparlap otyrmyz. Qalanyń árin ketirgen avtobeketter men temir jol vokzalyn retke keltirý boıynsha jumystar atqarylýda. Qazir «Qazaqstan Temir joly» 22 mlrd teńge bólip, 2 jylda qaıta jóndeýden ótkizedi», - dedi Almaty qalasynyń ákimi Baýyrjan BAIBEK.

Qalada kólik salasyn reformalaý aıasynda 2018 jyly avtobýs parkiniń úshten biri jańartyldy. Máselen, «Almatyelektrotrans» mekemesine 199 avtobýs satyp alý úshin qarjy bólingen. Al 200 qoǵamdyq kólikti «Green Bus Company» kompanıasy jańartsa, basqa da jeke tasymaldaýshylar shamamen 131 avtobýs alady. Jalpy, sońǵy eki jyl ishinde qala baǵyttary boıynsha 500 jańa avtobýs jolǵa shyqqan. Reısterdiń jıiligi 90% deıin artty, al ınterval 3 esege qysqardy. Sondaı-aq bıyl qalany kóriktendirý men aýlalardy jańartýǵa qarajat bólindi.

«Eger ótken jyly 455 aýla jóndelse, 2018 jyly qalanyń barlyq aýdandarynda taǵy da 585 aýla jańarady. Bul barlyq aýlalardaǵy 15 paıyzdy quraıdy. Bıyl jalpy 30 paıyzy zamanaýı, barlyq jaǵdaımen jasalady», - dedi Almaty qalasynyń ákimi Baýyrjan Baıbek.

Sondaı-aq 2018 jyly Medeý, Bostandyq, Túrksib jáne Jetisý aýdandaryndaǵy saıabaqtar retke keltirilmek. «Ylken jáne Kishi Qarasý» ózenderiniń jaǵalaýlaryn, jer asty ótkeli joldaryn qaıta jasaý úshin qarjy bólindi. Al bıyl turǵyn úı keshenin modernızasıalaý aıasynda 130 úı keshen jóndeýden ótkizilmek.