I Tor kózdi saýyt kıingen, Túrkiniń qara ulymyn. Kók táńiride súıingen, Sıpaǵan jel bop tulymyn. Basymnan túspeı dýlyǵam, Zulyhpardy qolǵa aldym. Bóriligimdi kór týymnan, Týlatyp qandy tolǵandym. Joryqtarda jol ańsap, Iyǵyna kúnniń asyldym. Saıgez toly qoramsaq, Kek pen sertke asyndym?! Azýyn bilep kókseregim, Talasty bir túlki ińirmen. Azattyq ed kóksegenim... Túndi túrttim kirpigimmen. Jerge túspes jebedeı, Tasqada baryp qadaldym. Ózen bop aqty telegeı, Duspandardan qan aldym. Keýdemnen meniń ıterme, Namysym oınar naızaǵaı. Elin satqan ıtterge... Suqtanam túırer naızadaı. II Tegime sen qara meniń, Jaraldym taý qursaǵynan. Ańsaımyn dala lebin, Babam izin kún saǵynam! Kóginde qyran qalyqtaǵan, Synyǵy menmin asyldyń. Tastaǵy tarıh qanyq maǵan, Salmaǵy jatyr ǵasyrdyń. Júrsemde bir kez aqtaban, Arymdy jaýǵa satpadym. Kelsede ajal qaptaǵan, Kebejege sneni saqtadym. Eshkimge bas ımegem, Osyp túser qamshymyn. Topyraǵyn jerdiń ılegen, Jalǵyz qasqa tamshymyn. Eshkimi teń kelmegen, Oǵylan batyr Oǵyzbyn. Tolǵaı da tolǵaı shermenen, Qorqyt tartqan qobyzbyn. Til men dindi nyq tanyp, Sóktim ómir tuńǵıyǵyn. Dinime sosyn qut daryp, Súıdim Alla nur bıigin. III Eı, býyrqanshy boıaýlar, Keltirshi meni kúıime! Tasyp bir ótsek oıanar, Dúbirde-dúbir dúnıe! Qyzyldy-jasyl sıqyr tús , Qyl qalamnan tógiler. Kelseńshi ushyp sıly qus, Jetseńshi jortyp bóriler. Ádemi már-már mataǵa, Jaǵaıyn boıaý órnegin. Syılashy Alla maǵan da, Toqıyn ómir órmegin. Dúldúl mingen bahadúr, Sýretin Ǵunnyń salaıyn. Toqtashy ýaqyt baǵa tur, Jasaıyn Saqtyń saraıyn. Altyn kıimdi, kóshpeli el, Kóterip bóri baıraǵyn. Panasy etip kók pen jer, Syzaıyn túrki aımaǵyn. Bilge Qaǵan, Kúltegin, Qaldyrsa tarıhyn tańbaǵyp. Ómirge keler kim tegin, Boıaýyma qara tańǵalyp?! Jánibek penen Kereıim, Handyqty qurǵan desedi. Tasydy sosyn mereıim, Mańdaıym baǵy bes eli?! Sheshende, batyr, abyzym, Dalamdy jatqa qıar ma? Baǵzy jatqan ańyzym, Bir sýretke sıar ma? Sýretim soǵys súrkeıli, Arpalys ajal ashty ún. Býyrqanyp boıaý búrkeıdi Jaǵyp em, qara, qashty tún... Qyl qalamnan tamyp ketti myń boıaý!

Qadyrsultan Núsipqan - 1987 jyly Shyǵys Túrkistannyń Altaı aımaǵy Shińgil aýdanynda dúnıege kelgen. 2008 jyly ata-mekenine oralǵan. Akademık E.A.Bóketov atyndaǵy Qaraǵandy Memlekettik ýnıversıtetiniń túlegi. Mektep qabyrǵasynda júrgende-aq ádebı shyǵarmashylyq jáne sýret salý ónerimen aınalysqan. Shyǵarmalary merzimdi basylymdarda jaryq kórip turady. Sýretshi jáne aqyn. Qaraǵandy jastar «Jyr-jaýhar klýbynyń» múshesi. Respýblıkalyq Birneshe jyr músháıra jeńimpazy. Tyrnaq aldy ádebı týyndysy 2002 jyly QHR-da «Jaýqazyn» jýrnalynda «Lálá gúli men Qyzǵaldaq» taqyrybynda alǵash jaryq kórgen. Qazir Almaty oblysy Alakól aýdanynda turady.