Almatyda «Rýhanı jańǵyrý» baǵdarlamasy aıasynda Jambyl atyndaǵy kitaphana jastardyń zıatkerlik ortalyǵy retinde qaıta jasalyp, modernızasıalandy.

Kúrdeli jóndeýden ótken kitaphanada kitaptarmen, elektrondy aqparatpen jumys isteýge, jańa shyǵarmalardy tanystyrýǵa, qujatty jáne ǵylymı- tanymdyq fılmderdi kórýge múmkindik beretin zamanaýı «open space» jáne tegin «Wi-fi» men kofeıná bar.

«Memleket basshysy atap ótkendeı, «Jańa gýmanıtarlyq bilimniń» alǵashqy oqýlyqtaryn tanystyrýda zamanaýı ult básekelestiginiń basty sharttarynyń biri jas urpaqtyń bilimdiligi. «Prezıdenttiń «Qazaqstan-2050 Strategıasyn qoldaý» qoǵamdyq qorynyń qarjylyq kómegi arqasynda bilim mekemelerin modernızasıalaýdyń jańa tásili júzege asty. Jobaǵa qatysqan almatylyq jastar klasıkalyq kitaphanany jastardyń kovorkıng- ortalyǵymen oıdaǵydaı úndestire bildi», - dep atap ótti megapolıs ákimi Baýyrjan Baıbek.

Jańarǵan ınterermen qosa «Sıfrly Qazaqstan» baǵdarlamasyna saı kitaphananyń barlyq kitap qory sanalyp, elektrondyq formatqa kóshedi. Bulardan ózge, qaıta jańǵyrǵan Jambyl atyndaǵy kitaphana jalpy kitap qory 1,8 mıllıon dana bolatyn qalanyń biregeı kitaphana júıesine endi. Kópshilik oqyrman úshin kitaphana bıylǵy jyldyń mamyr aıynda ashylady.

«Munda oqyrman qajetti aqparatty alyp qana qoımaı, óz pikirimen bólisip, ony talqylaı alady. Biz keńistikti zamanaýı jáne jaıly jasaýǵa tyrystyq. Mysaly, 550 spot jaqsy jaryq berýmen qatar qolaıly atmosferany týǵyzady», - dedi joba kýratory Kámılla Luqpanova.

Eske salsaq, qalany jańartýdyń ekinshi jyly boıyna bıylǵy jazda birqatar negizgi dańǵyldar, sonyń ishinde Nazarbaev, Abaı, Abylaı han dańǵyldary jáne basqalary jańarady. Bulardan ózge, burynnan jańarǵan 455 aýla alańdaryna qosymsha taǵy da 585 aýla jóndeledi. Megapolıste 157 kóshe men 30 shaqyrym qala trotýarlary jańarady.