Búgin Óńirlik komýnıkasıalar qyzmetinde Aqparat jáne komýnıkasıalar mınıstrliginiń BAQ salasyndaǵy memlekettik saıasat departamenti dırektory Eldos Náshiráliniń jáne «Qazteleradıo» AQ-nyń tutynýshylardy qoldaý jáne satý ortalyǵy dırektory Ǵanı Tumatovtyń qatysýymen brıfıń ótti.

Brıfıńte spıkerler oblystyń sandyq efırlik teleradıo habarlaryn taratýǵa kóshýi jeltoqsan aıyna josparlanǵanyn habarlady.

Spıkerler jańa formatqa kóshýdi qamtamasyz etý úshin úlken jumystyń atqarylǵandyǵyn atap ótti. Atap aıtqanda, 79 radıotelevızıalyq stansıalar salynyp, olardyń taratý aýmaǵy 2,4 mln. halyq turatyn 860 eldi mekendi qamtydy. «Teleradıo habarlaryn taratý» Zańynda teleradıonyń habar taratýy jańa formatqa kóshetinin halyqqa aldyn - ala habarlaý kerektigi kórsetilgen. Osyǵan baılanysty oblys ákimdiginde jıyn ótip, onda sandyq efırlik teleradıo habarlaryn taratýǵa kóshýdi qamtamasyz etý is-sharalar jospary bekitildi.

«Sandyq efırdiń analogtyq júıeden aıtarlyqtaı artyqshylyqtary bar. Atap aıtqanda, sandyq tehnologıa arqyly joǵary sapadaǵy beıne men dybysqa qol jzetkizemiz. Sondaı-aq, taralymy aýqymdy jáne áldeqaıda kóp telearnalardy kórý múmkindigi týady. Máselen, oblys ortalyǵynda 30 arnaǵa deıin, al aýyldaǵy kórermender keminde 15 arnany tamashalaı alady», – dedi Eldos Náshiráli.

Qazirgi ýaqytta oblysta daıyndyq jumystary júrgizilýde. Osy jyldyń aıaǵyna deıin Manǵystaý, Ońtústik Qazaqstan jáne Jambyl oblystarynyń sandyq taratylymǵa kóshýi josparlanýda.