Oblystyq mádenıet jáne tilderdi damytý basqarmasynyń uıymdastyrýymen aǵymdaǵy jyldyń 10-13 mamyr kúnderi aralyǵynda Qazaqstandaǵy Ózbekstan Respýblıkasynyń jylyna oraı Ózbek ulttyq akademıalyq drama teatrynyń Ońtústik Qazaqstan oblysynda gastróldik issapary ótti. Atalǵan jyl aıasynda óńirimizge kelgen ózbekstandyq óner ujymy úsh kún boıy oblys jurtshylyǵyna Erkın Hýshvaqtovtyń «Kóńil» komedıasyn usynyp, zor qoshemetke bólendi.

Mádenı qarym-qatynasty ulǵaıtý,  kórshi eldiń sahnadaǵy erekshe qoıylymdaryn kúngeı ólkeniń kórermenderine tartý etip, dostyq baılanysty pash etýge baǵyttalǵan  sapar barysynda ózbekstandyq óner ujymy Shymkent qalasy men Saıram aýdandarynda atalǵan týyndy arqyly otbasy baqyty men qundylyǵy jaıynda tereń oı qozǵady. Sondaı-aq, delegattar óńirimizdiń kıeli oryndary Saıram aýdanyndaǵy Ibrahım ata, Qarashash ana keseneleri men Túrkistan qalasyndaǵy Qoja Ahmet Iasaýı basyna baryp quran baǵyshtap, zıarat etti.

Gastróldik sapardyń jabylý saltanatynda Ózbek ulttyq akademıalyq drama teatrynyń dırektory, Ózbekstan Respýblıkasyna qyzmet kórsetken ártis, «Mehmat-SHýhrat» ordeniniń ıegeri Masýdov Fathýlla Hýsanuly jyly shyraımen qarsy alyp, erekshe yqylas bildirgen ońtústikqazaqstandyqtarǵa alǵysyn bildirip, eki el arasyndaǵy baılanys odan ármen  nyǵaıa beretindigine senimdiligin jetkizdi.

Shara sońynda teatr ujymyna Oblystyq mádenıet jáne tilderdi damytý basqarmasynyń Mádenıet jáne óner bóliminiń basshysy Sharafıeva Ǵalıa Alıkenqyzy men OQO Ózbek mádenı ortalyǵynyń tóraǵasy Ikram Hashımjanov arnaıy alǵys hattar tabystady.