Ońtústik Qazaqstan oblysynyń ákimi Janseıit Túımebaev Shymkent qalasyndaǵy zoobaqty qaıta qurý baǵytyndaǵy jumystarmen tanysty.

1980 qurylǵan zoobaqtyń qazirgi  dırektory Nurǵazy Buharbaev máskeýlik arhıtektorlardyń qatysýymen baqtyń bas konsensıasy ázirlengenin atap ótti. Sonymen qatar ol qaıta qurý jumysy boıynsha 5 jyl buryn «Afrıka» aýmaǵy, ákimshilik ǵımaraty jáne «Taý» ekspozısıasy bastalyp, josparly ýaqytynda aıaqtalǵanyn jetkizdi. Qazirgi kezeńde 9 volerdiń qurylys jumystary júrip jatqanyn aıtty.

Budan bólek, haıýanattar baǵynyń ishi kógaldandyrylyp, ishki joldar men aıaqjoldar boıyna zoobaq logotıpi beınelengen oryndyqtar ornatylǵan. Al, ortalyq ishki joldardaǵy  gúlzarlarda jaǵalaı ań músinderi qoıylǵan.

Sırek kezdesetin jáne joıylyp bara jatqan jan-janýarlardy saqtap, olardy kóbeıtý maqsatynda qurylǵan zoobaqta búgingi tańda 2,5 myńǵa jýyq  jan-janýar bar. Mundaǵy kelýshilerdiń sany ótken jyly 426 myńǵa jetse, osy jyldyń 3 aıynda  60 myńnan astam adam kelgen.

Janýarlardyń ósý dınamıkasy jyl sanap artyp, ań-qustardyń túri  75-ten 249-ǵa jetken. Onyń ishinde 40 shaqtysy qyzyl kitapqa engen. Shymkent  memlekettik  zoologıalyq  saıabaǵyndaǵy atqarylyp jatqan jumysqa oń baǵasyn bergen aımaq basshysy Janseıit Túımebaev qurylys jumystaryn jedeldetýdi tapsyrdy.

«Zoobaq - bul qalamyzdyń turǵyndary men qonaqtaryn qýanyshqa bóleıtin jáne maqtan tutatyn erekshe jerleriniń biri bolýy tıis. Sondyqtan da haıýanattar baǵyndaǵy qurylys jumystarynyń barlyq talaptarǵa saı júrgizilýine nazar aýdaryp, aýmaqty abattandyrý jáne kógaldandyrýdy myqtap qolǵa alýdy, ishki joldardy retke keltirýdi tapsyramyn. Sonymen qatar 2020 jylǵa deıin jan-janýarlar túrin kóbeıtip, kelýshiler sanyn arttyryńyzdar. Al kelýshilerge yńǵaıly jaǵdaı jasańyzdar, óıtkeni bul jer tanymdyq demalys orny», - dedi oblys ákimi.

Aıta keteıik, zoobaqtyń jalpy aýdany - 30 gektardy quraıdy. Onyń ishinde ekspozısıalar 19 gektar jerge ornalastyrylǵan.  Zoobaqta tuıaqtylar, jyrtqyshtar, prımattar, qustar, balyqtar, baýyrymen jorǵalaýshylar jáne qosmekendilerdi tamashalaýǵa bolady. Sondaı-aq, munda balyqtyń 70 túrinen 1 254 balyq mekendeıtin akvarıým ornalasqan.