Shymkentte Jeńistiń 73 jyldyǵyna arnalǵan «Er esimi - el esinde» atty saltanatty is-shara ótti. «Qaharman Ult» sherýimen bastaý alǵan sharaǵa  úsh myńǵa tarta turǵyn qatysty.

Shymkent qalasyndaǵy «Dańq» memorıaly kesheninde ótken saltanatty jıynǵa oblys ákimi Janseıit Túımebaev pen  qala ákimi Nurlan Saýranbaev, maıdangerler men tyl eńbekkerleri, zıaly qaýym ókilderi men soǵysqa qatysqan azamattardyń urpaqtary qatysty.

Bul merekeniń elimizdiń ómirinde alatyn orny erekshe ekenin aıtqan aımaq basshysy ekinshi dúnıejúzilik  soǵysynyń ardagerleri men tyl eńbekkerlerin jáne barsha ońtústikqazaqstandyqtardy Jeńistiń 73 jyldyǵymen quttyqtady.

«Qurmetti maıdangerler! Sizderdiń qan maıdannyń aldyńǵy shebindegi erlikterińizdiń, tyldaǵy eren eńbekterińizdiń arqasynda qazaqstandyqtardyń búgingi urpaǵy beıbit ómir súrýde. Otan úshin otqa túsip, qan maıdandaǵy jeńiske degen tabandylyqtaryńyz  úshin, alǵys bildiremiz! Ardagerlerdiń jankeshti erligi men eńbegi jadymyzdan eshqashan óshpek emes. Elbasymyz Nursultan   "Biz árqashanda Jeńis kúnin aǵa býynnyń Otanǵa degen sheksiz súıispenshiliginiń, jastardy erlik pen patrıotızm rýhynda tárbıeleýdiń ólsheýsiz ónegesi dep bilemiz!" dep óshpes dańqty erekshe atap ótken bolatyn. Sondaı-aq Memleket basshysy jyl saıynǵy Joldaýynda  aǵa urpaq ókilderin áleýmettik qoldaýda, ásirese densaýlyqtaryn túzetý, saýyqtyrý jáne zeınetaqy ústemelerin qosý máselelerin nazardan tys qaldyrǵan emes»,-dedi Janseıit Túımebaev.