Ońtústik Qazaqstan oblysynda 870 myńnan asa  azamat jalpy zeınetaqy men arnaıy áleýmettik tólem alady. Olardyń qarjy qajettiligine aı saıyn 24,1 mlrd teńge jumsalady. Bul týraly  Óńirlik komýnıkasıalar qyzmetinde ótken brıfıńte QR Eńbek jáne halyqty áleýmettik qorǵaý mınıstrligi Eńbek, áleýmettik qorǵaý jáne kóshi-qon komıtetiniń Ońtústik Qazaqstan oblysy boıynsha departamentiniń basshysy Ásıa Temirbaeva málimdedi

Departament basshysynyń sózinshe, aǵymdaǵy  jyldan bastap arnaýly memlekettik járdemaqy tólemine ózgertýler men tolyqtyrýlar engizilgen.

«Jyl basynan oblys kóleminde arnaýly memlekettik járdemaqy alýshylardyń sany 298 353-ti qurap, oǵan 2,3 mlrd teńge kóleminde tólem júrgizilgen. Bıyldan bastap mundaı járdemaqynyń quramynan «Altyn Alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen nagradtalǵan kóp balaly analarǵa memlekettik járdemaqy sanaty bólinip, jeke memlekettik qyzmet túri bolyp qosyldy. Osy atalǵan járdemaqy boıynsha 2018 jyldyń birinshi toqsanynda 70 147 memlekettik qyzmet kórsetildi», - dedi Ásıa Quralqyzy.

Sondaı-aq, departament basshysy osy jyldan bastap kezeń-kezeńimen áıelderdiń zeınetke shyǵý jasy ulǵaıatynyn aıtty. 1960 jyldyń 1 qańtarynda týǵan áıel zeınetke 2018 jyldyń 1 shildesinde, ıaǵnı, 58,6 jasynda shyǵady. Eger áıel 1960 jyldyń 1 shildesinde dúnıege kelgen bolsa, onyń zeınetkerlik jasy 59 keledi. Sebebi, 2019 jyldyń 1 qańtaryna onyń jasy 58,6 tolǵanymen, 2019 jyly jalpy belgilengen zeınetkerlik jas 59-dy quraıdy.

Aıta keteıik, 2018 jyldyń 1 qańtaryndaǵy jaǵdaı boıynsha oblysta jalpy 234 924 zeınetker bar. Olarǵa 10 mlrd teńge kóleminde zeınetaqy tólemi júrgizilgen.