Shymkent qalasynyń ákimi Nurlan Saýranbaev ózine aıtylǵan synnan soń qazaqsha kitaptar oqyp júrgenin aıtty. Bul týraly shahar basshysy BAQ ókilderimen kezekti ret qala aralaýǵa shyqqan kezde aıtty.

Nurlan Saýranbaev qazaq tilinde jaqsy sóıleı almaǵanyn synaǵandarǵa alǵysyn bildirip, ol áreketteri ózine jiger syılaǵanyn atap ótti.  Osydan keıin Abaıdyń kitaptaryn oqyp, tilin jetildirip jatqanyn jetkizdi.

«Ony jazǵan jigitterge raqmet aıtqym keledi. Shyny kerek, maǵan úlken motıvasıa syılady. Qandaı syn bolsa da, durys qabyldaý kerek qoı. Sol synnan soń 8-9 shaqty kitap oqyp shyqtym. Onyń ishinde Abaıdyń qara sózderi de bar», - dedi Shymkent basshysy.

Budan bólek, Nurlan Saýranbaev dombyra úırenip júrgenin de aıtyp qaldy.

«Dombyra tartýdy úırenip júrmin. Qazir «Túrkimen» kúıin tarta alamyn. «Hafızdi» úırenip jatyrmyn», - dedi ol.

Eske sala ketsek, shahar basshysy osy jyldyń qańtar aıynda qaladaǵy aýdandardyń biriniń ákimine esepti tek qazaq tilinde jasaǵanyna eskertý jasaǵan bolatyn. Ol sondaı-aq óziniń halyq aldyndaǵy esep berý jıyny kezinde oıyn qazaqsha jetkizemin dep, áleýmettik jelilerde «juldyz» bolǵan edi. Qazaq tiline qatysty synaǵan turǵynǵa ákim óleń shýmaqtarymen jaýap bergen edi.

«Qaırat degen atym bar, qazaq degen zatym bar, erkek toqty qurbandyq. Atam deseń atyńdar!». Endeshe Rasýl Gamzatovtyń sózi bar «eger meniń tilim erteń joıylatyn bolsa, men búgin ólýge daıarmyn» degen. Bul jerde men sizge kómekshi bolamyn, aǵa. Birge jumys isteıik», - degen edi ákim Saýranbaev.