Shyǵys Qazaqstan oblysy Aıagóz qalasyndaǵy 10810 áskerı bóliminde merzimdi áskerı qyzmet atqaryp júrgen qostanaılyq 21 jastaǵy Valerıı Krýjnov belgisiz jaǵdaıda qaıtys bolǵan. Bul týraly onyń týysy Aleksandra Badakınaǵa silteme jasap "Kostanaıskıe novostı" basylymy habarlady. Onyń aıtýynsha, Valerıı Krýjnovtyń "uıyqtap jatyp qaıtys bolǵany" týraly habardy sarbazdyń úı-ishine maýsymnyń 8-i kúni estirtken.

"Uıyqtap jatyp qalaı qaıtys bolǵanyn uqpaı otyrmyz... Kóp suraqqa ázirshe jaýap joq", - degen Badakınanyń sózin keltirgen basylym.

Týysynyń sózinshe, otbasyndaǵy jalǵyz bala bolyp er jetken Valerıı Krýjnovty áskerı qyzmetke shaqyrtqan kezde dárigerler onyń júreginde syrqat baryn anyqtaǵan. "Odan armıaǵa barǵyń kele me dep suraǵanda Valera: "Eger qajet bolsa - baramyn" dep jaýap bergen", - deıdi Aleksandra Badakına.

Mamyrdyń 1-i kúni Qazaqstan qarýly kúshteri qataryna mindetti áskerı boryshyn óteýge Qostanaı oblysynan shaqyrtylǵan Valerıı Krýjnov birneshe aptadan soń áskerı ant qabyldaǵan. Ol Aıagózdegi "Shyǵys" aımaqtyq áskerı basshylyǵyna qarasty 10810 áskerı bóliminde qyzmet atqarǵan.