BI Group kompanıasynyń negizin qalaýshy qazaqstandyq kásipker ári sportshy Aıdyn Rahymbaev tabysty kompanıa qurýdyń qupıasyn ashty.
Qańtar aıynda ótken "Dakar" rallı-marafonynda úzdik ondyqqa kirgen ol eńbek jolyn qarapaıym qurylysshy retinde bastaǵan Vlast.kz saıtyna bergen suhbatynda aıtty. Búginde iri kompanıanyń basshysy bolsa da, ol áli kúnge deıin qurylysshylyqtan bas tartpaǵanyn aıtty.
"Men qazir de qurylysshymyn. Iá, buryn úıler salǵanmyn, qazir kompanıanyń qurylysyn júrgizip jatyrmyn. Qatardaǵy jumysshy bolǵanymda men iri kompanıanyń basshysy bolýdy armandaǵan joqpyn. Alaıda, kishkentaıymnan oqýǵa qumar bolǵanym meni osy kúnge jetkizdi", - deıdi Rahymbaev.
Ol bızneste tabysty bolýy úshin tamyr-tanys, baılanys kerek pe degen suraqty jaýapsyz qaldyrmady.
"Keıde baılanys kerek, keıde kerek emes. Aldyǵa maqsat qoısań, bárine de jetýge bolady. Jalpy baılanys degen ne? Meniń ákem 30 jyl boıy kolhozda mehanızator bolyp eńbek etti. Anam ómir boıy poshtashy boldy. Menińshe, baılanys degenimiz jaqyn adamdaryń men dostardyń senimi", - deıdi kásipker.
Aıdyn Rahymbaev qarapaıym qurylysshydan kompanıa basshysy ataný úshin ne isteý kerektigin de túsindirip ótti.
"Men jaqsy ári sapaly jumys istesem dep oıladym. Al atalǵan jumysqa qanshama kúsh ketetini bólek áńgime. Bıyl bizdiń kompanıamyzǵa 20 jyl tolady. Al men jeti kúndik eńbek demalysyma on jyldan keıin shyǵyppyn. Bar ýaqytta jumys istedim. Tipti, qazirdiń ózinde eńbek demalysyna ketetin ýaqyt joq. Men tabysqa jetýdiń eń basty kepili – tek qana jumys isteý dep bilemin. Tipti, bir tanymal adamnyń "Senbi kúni demalatyn bolsań, kompanıanyń 60 paıyzǵa ósýi múmkin emes" degeni bar", - deıdi qazaqstandyq kásipker.
Ol óziniń basqa bıznesmenderden qandaı aıyrmashylyǵy baryn da atap berdi.
"Men bóliskendi jaqsy kóremin. Kompanıadaǵy top-menedjerlermen men kompanıanyń úlesimen bólisemin. Tabysymmen bólisemin. Búginde kompanıadaǵy 8 myń adamnyń 800-i bonýstyq baǵdarlamalarǵa ıe. Iaǵnı, ózderi jumys isteıtin jobadan qosymsha paıda kórip otyr. Men barlyq jumysshynyń osyndaı tabys tabatynyn kúnine tezirek jetkim keledi", - deıdi kásipker.
Sonymen qatar, Aıdyn Rahymbaev áli kúnge deıin qurylys nysandaryn aralaýdan sharshamaıtynyn, tipti, árbir jertóle men shatyrlardy da baqylap, kórip shyǵatynyn aıtqan.
"Másele bárin tekserip, qatań baqylaýda emes. Men osy isimnen ózim rahat alamyn. Qaı jerin jaqsartyp, qaı jerin túzetý kerektigine kóz jetkizemin. Árbir jeksenbi saıyn 25-30 jumysshyny ertip alyp, qurylys alańyn aralap shyǵý ádetime aınalǵan", - dedi ol.
Aıdyn Rahymbaev alǵashqy mıllıonyna 28 jasynda qol jetkizgen. Qazir kásipker $280 mln-men Forbes.kz jýrnalynyń nusqasy boıynsha 23-nshi orynǵa turaqtady.
Mıllıoner qaıyrymdylyqqa qomaqty qarajat bólip, otandyq ónerge janashyr retinde tanylǵan azamat.
Eske sala keteıik, tanymal kásipker avtojaryspen de áýestenedi. Suhbat barysynda ol jumysyna kesiri tımeý úshin jarysqa tek demalys kúnderi baryp, jumys ýaqytyna úlgerý úshin marapattaý rásimine qatyspaıtynyn da ashyq aıtty.
Aıdyn Rahymbaev bıylǵy "Dakar" kópkúndiginde 9-shy oryn ıelengen bolatyn.
