Darıa ómir dármensiz pendeniń pikirimen sanasqan ba? Búgingi bizdiń keıipker – Erken Júndibaev tabandap turǵan tarshylyqty túbinde jeńemin degen urandy alǵa tartyp ómir súrip jatyr. Ol qolbaılaý bolǵan suryqsyz kúnderden qutylǵysy keledi.
«Osydan bes aı buryn jubaıym Darıhamen birge Astanadaǵy Jumyspen qamtý ortalyǵyna jumys izdep bardym. Jeti balamdy baǵýym kerek. Osyǵan deıin turaqty jumysym bolmady. Bala-shaǵamnyń rızyq-nesibesin ár jerden izdep taptym» – deıdi ol.
Bizdiń keıipker búginde áleýmettik álsiz toptardy jumyspen qamtyp otyrǵan «GreenTal» kásipornynda aǵash ustasy qyzmetin atqarady. Erkenniń qolynan kelmeıtini joq. Ol jasaǵan buıymdar kóptiń suranysyn týǵyzyp júr.
«Men osy jumys ornyna kelgeli túrli jıhaz jabdyqtaryn jasaýdy úırendim. Mundaǵy sheberler bir-birinen asyp túsedi. Biri piship kesse, ekinshisi ony óńdep jatady. Al men jartylaı daıyn bolǵan ónimderdi qurastyramyn. Túrli túspen boıaýdy da óz moınyma aldym. Kásiporyn shaǵyn bolǵanymen qoǵamǵa úlken paıdasyn tıgizip jatyr. Men sekildi áleýmettik álsiz top ókilderine jumys berip otyr. Munda tek joqshylyqtan taryqqandar emes, jarymjan jandar da bar. Báriniń kózdegeni – bala-shaǵanyń qamy», - deıdi Erken.
«Erkenniń eń asyl qasıeti – óz isine adal. Men onyń jaýapkershiligi men talabyna tánti boldym. Ár isine tıanaqty. Jumysqa ornalasqanyna az ýaqyt bolsa da, birden meńgerip ketti. Erkenniń endigi maqsaty – ózi sekildi jandarǵa qol ushyn sozý. Kórgen túıgenimen bólisip, aǵashtan buıymdar jasaýdy basqalarǵa da úıretý», -deıdi kásiporyn basshysy Emın Askerov.
Astanalyq bizdiń keıipker jyl basynda Halyqty jumyspen qamtý ortalyǵyna jumys izdep barǵan edi. Áıeli bala kútiminde, otbasynda ózinen basqa jumysqa qabiletti adam joq. Osy rette ortalyq mamandary memlekettik ataýly áleýmettik kómek jobasyna tirkep, Erkenniń shańyraǵyna qol ushyn sozǵan edi. Aı saıyn jan basyna shaqqanda beriletin tólemaqyny taǵaıyndap, turaqty jumysqa ornalastyrdy. Búginde Astanadaǵy jumyspen qamtý ortalyǵy ataýly áleýmettik kómek jobasy aıasynda 500-den asa mamanǵa kómek kórsetipti.
