Batys Qazaqstan oblysynda «Mereıli otbasy-2018» ulttyq baıqaýynyń aımaqtyq kezeńi qorytyndylandy. Baıqaý dástúrli túrde jyl saıyn ótip keledi. Saltanatty sharaǵa arnaıy kelgen oblys ákiminiń orynbasary Ǵabıdolla Ospanqulov otbasylyq qundylyqtardy dáripteıtin baıqaýdyń mańyzdylyǵyn atap ótti.
- Otbasy-shaǵyn memleket. Kez kelgen qoǵamnyń irgetasy-otbasy ekendigi belgili. Sondyqtan otbasylyq qundylyqtardy jastardyń sanasyna sińirý memlekettik saıasattyń basty baǵyttarynyń biri. Elbasymyz «Rýhanı jańǵyrý» baǵdarlamasynda salt-dástúrimizdi jańǵyrtý qajettigine aıryqsha kóńil bólgen. Al qazaq halqynyń otbasy dińgegi árkez myqty bolǵan. Sondyqtan el ishindegi úlgili, ónegeli otbasylardy ózgelerge úlgi etip nasıhattaý-bizdiń basty mindetterimizdiń biri, - dep sózin sabaqtaǵan Ǵabıdolla Abdollauly baıqaý jeńimpazdaryna dıplomdar men syılyqtar tabystady.
Oblystyq baıqaýdyń qortyndysy boıynsha úshinshi oryn jánibektik Bısenǵalıevter, ekinshi oryn zelenovtyq Imashevtar, birinshi oryn Qaztalovtyq Erekeshovter otbasyna buıyrsa, bas júldeni oraldyq Almaǵambetovtar otbasy ıelendi. Jeńimpaz otbasy qyrkúıek aıynda elordamyz Astana qalasynda ótetin baıqaýdyń grand-balyna qatysady.
«Aq Otaý» qoǵamdyq birlestiginiń tóraıymy Altynaı Esqalıevanyń aıtýynsha, baıqaýdyń oblystyq kezeńine 26 otbasy qatysty.
-Jeńimpaz, júldeli oryndarǵa qosa, ár otbasyǵa túrli atalymdar men baǵaly syılyqtar berildi. Jyl saıyn baıqaýǵa qatysýǵa nıet bildirýshilerdiń qatary kóbeıip keledi. Bul joly baıqaýdyń bas júldesin jeńip alǵan oraldyq Almaǵambetovter otbasy bir-birine degen erekshe qurmetimen, toleranttylyǵy, eńbeksúıgishtigi, úsh til biletindigimen erekshelenedi, -deıdi ol.
Saltanatty sharada baıqaýǵa qatysýshy barlyq otbasylar túrli atalymdarmen marapattaldy. Olardyń qatarynda «Eline eńbegi sińgen» atalymymen qaratóbelik Qazıevter otbasy, «Jas urpaqqa úlgi eter otbasy» atalymymen zelenovtyq Tabyldıevter otbasy, «Ónerli otbasy» atalymymen marapattalǵan aqjaıyqtyq Beılovter otbasy bar.
Gúljamal JOLDYǴALI,
«Oral óńiri»
