Jaqynda respýblıkalyq mańyzy bar qalalardyń biri Shymkentte mıgrasıalyq HQO ashylyp, ol eńbek mıgranttaryna memlekettik qyzmetter kórsetýde. Bul týraly «Azamattarǵa arnalǵan úkimet» memlekettik korporasıasynyń baspasóz qyzmeti jazdy, dep habarlaıdy Qamshy.kz aqparat agenttigi digitalkz.kz saıtyna silteme jasap.
22-shi maýsymda Shymkent qalasynda mıgrasıalyq halyqqa qyzmet kórsetý ortalyǵy óz jumysyna kirisken bolatyn. Ony «Azamattarǵa arnalǵan úkimet» memlekettik korporasıasy QR İİM-men birlesip ashqan edi.
MHQO-da sheteldik azamattar memlekettik qyzmetterdi «bir tereze» qaǵıdaty boıynsha bekitilgen standartqa saı ala alady. Olar: elektrondyq kezek, arnaıy jabdyqtalǵan jumys oryndary, profıldi mamandar jáne yńǵaıly jumys kestesi. Qyzmet alýshylar 1-2 saǵattyń ishinde medısınalyq tekseristen, daktıloskopıadan óte alady. Sondaı-aq saqtandyrý polısin rásimdep, jeke sáıkestendirý nómirin (JSN) ala alady.
Jańa MHQO jumys barysyn jeńildetip qana qoımaı, sybaılas jemqorlyq áreketteriniń aldyn-alýǵa jol ashady. Jyl basynan beri kóshi-qon baǵyty boıynsha 267 287 memlekettik qyzmet kórsetilgen.
«Azamattarǵa arnalǵan úkimet» memlekettik korporasıasynyń Túrkistan oblysy boıynsha fılıalynyń dırektory Erjan Jeńisbekovtyń aıtýynsha, elimizge kelgen sheteldik azamattar qujattaryn 1 kúnniń ishinde alý múmkindigine ıe boldy. Al, buryn birneshe kún ketetin.
«Buryn sheteldikter jumys isteýge ruqsat alý úshin qajetti qujattaryn rásimdep, birneshe kún júretin. JSN alyp, salyq máselesin sheship, saqtandyrý anyqtamasyna qol jetkizý úshin birneshe mekemeni aralaýshy edi. Endi sheteldikter qujattardy bes kún boıy emes, bir kúnniń ishinde rásimdeý múmkindigine ıe boldy. Bul mıgranttar úshin ǵana emes, jumys berýshi úshin de óte qolaıly», - deıdi ol.
Óńirdegi jańa ortalyq Nursat yqshamaýdany, Baıterekov kóshesi, 89 úı mekenjaıynda ornalasqan. Atalǵan mekeme tańǵy saǵat 09-dan keshki saǵat 18.30- deıin, túski úzilissiz qyzmet kórsetedi.
Aıta keteıik, elimizdegi eń alǵashqy mıgrasıalyq HQO 2018 jyldyń qańtarynda Astanada ashylǵan bolatyn. Onyń negizgi maqsaty - kóshi-qon qyzmetin ońtaılandyrý. Jalpy mıgrasıalyq HQO óz kezeginde kóshi-qon salasyndaǵy kedergilerdi joıýǵa baǵyttalyp, sheteldik azamattarǵa memlekettik qyzmet túrlerin kórsetýde. Jaqynda osyndaı ortalyq Astana qalasynyń Esil jáne Saryarqa aýdandarynda ashylmaq. Buǵan qosa, Almaty jáne Aqtóbe qalalarynda mıgrasıalyq HQKO ashylady dep josparlanyp otyr.
