Almatydaǵy Balýan Sholaq atyndaǵy sport saraıynda eki urynyń qolynan qaza tapqan mánerlep syrǵanaý sheberi Denıs Tenmen qoshtasý rásimi ótýde, dep habarlaıdy Qamshy.kz aqparat agenttigi.
Qysqa ǵana ǵumyrynda eliniń súıikti ulyna aınala bilgen sportshymen qoshtasýǵa kelgen halyqtyń qarasy óte kóp.
Sport saraıyna adamdar kirip úlgere almaı jatyr. Elimizge belgili mánerlep syrǵanaý sheberimen qoshtasýǵa kelgen qala turǵyndarynyń biri: «Búgin Denıs Tenmen qoshtasý sharasy bolyp jatyr. Biraq sport saraıynyń ishine kire almaı jatyrmyz. Balýan Sholaq sport saraıynyń aldynda halyq óte kóp, esikke syımaı jatqan sekildi», - deıdi.
Sportshyny aqtyq saparǵa shyǵaryp salýǵa Almaty qalasy ákimdigi, elimizge belgili boksshy Gennadıı Golovkın, saıasattanýshy Aıdos Sarym jáne ózge de qoǵam qaıratkerleri men bedeldi tulǵalar kelgen.
