Denıs Tendi óltirdi degen kúdiktiniń biri Arman Qudaıbergenov avtomashınalardyń aınasyn urlap, Astanada 11 shildede ustalǵan eken. Alaıda quqyq qorǵaý organdary ony jibere salǵan. Eger de ony jibermeı, abaqtyǵa japqanda mundaı qaıǵyly oqıǵa bolmaýshy edi. Bul jaıynda Astana qalasynyń turǵyny Sapar Shamshıev aıtyp berdi.

Onyń aıtýynsha, Qudaıbergenov Arman 11 shilde kúni túnde onyń mashınasyna urlyqqa túsken. Qylmys ústinde qolǵa túsip, eshqaıda shyqpaý týraly qolhat jazyp, 20 shilde kúni bolýy tıis sottan qutylyp ketken.

«Oqıǵa oryn alǵannan keıin kelesi kúni tańerteń men aınalarymdy Almaty aýdanynyń polısıa bólimshesinen alyp kettim. Sol jerde menen ekinshi ret túsinikteme alyp, 7-10 kúnnen keıin Qudaıbergenovtyń soty bolatynyn aıtty. Ol jigitke ne boldy, ózi qazir qaıda? dep suraǵanymda, «ol aldyn da sotty bolǵanyn moıyndap túsinikteme jazdy» dep jaýap berdi. Sotqa deıin ýaqytsha qamaýda bolady dep túsindim. Alaıda 13 shilde kúni maǵan tergeýshi habarlasyp, «meniń nómirimdi Arman Qudaıbergenge berýge bola ma?» dep surady. «Ne úshin?» dedim. Menimen kelisimge kelý jaıynda sóıleskisi keletinin aıtty. Bas tarttym da, nómirimdi berýge tyıym salyp, isti sońyna deıin jetkizgim keletinin aıttym. Ony qylmystyq jaýapqa tartyp, ózine laıyq jazasyn berý kerek dedim. Qaıǵyly oqıǵa bolǵan kúnge deıin ol qylmysker qamaýda otyr dep oılaǵan edim», - deıdi Sapar Shamshıev.

Alaıda juma kúni onyń úıine krımınaldy polısıa qyzmetkerleri kelip, Arman Qudaıbergenov jaıynda suraǵan.

«Maǵan onyń sýretterin kórsetkende men birden tanydym. Ol jigit Denıs Tendi óltirgen kúdikti ekenin aıtty. «Bul qalaı bolýy múmkin dep tańqaldym. Qudaıbergenov Astanada qamaýda otyr emes pe, al qandy oqıǵa Almatyda boldy» degenimde, ol uryny eshqaıda shyqpaý týraly qolhatpen qamaýdan jibergenin aıtty. Iaǵnı, ol jigittiń soty keshe Astana qalasynda ótýi tıis bolatyn. Eger de Qudaıbergenovty qamaýdan bosatyp jibermegende, ol Almatyǵa bara almas edi jáne mundaı qaıǵyly oqıǵa oryn almas edi...», - deıdi Astana turǵyny.

Derekkózi: Time.kz