Almatyda qalanyń mańyzdy obektilerine arhıtektýralyq jaryq berý jumystary jalǵasýda. Keshke qaraı megapolıstegi Yqylas atyndaǵy halyq aspaptary mýzeıi, Ofıserler úıi, 28-shi gvardıashyl-panfılovshylar atyndaǵy saıabaqtaǵy Dańq Memorıaly men Baýyrjan Momyshulynyń eskertkishi, Jambyl atyndaǵy respýblıkalyq fılarmonıa men Qazaq memlekettik sırkiniń ǵımarattary túngi jaryqtar nuryna bólendi.

Qazirgi kezde arhıtektýralyq jaryq kózderi kóptegen megapolısterde qoldanylady, olar ár kórneki oryndardy aıshyqtaı túsip, keshki serýen kezinde qolaıly jaǵdaı týǵyzady. Óz kezeginde zamanaýı energıajınaqtaýshy tehnologıalar elektroenergıasyn únemdep, jaryq kózderiniń uzaqtyǵyn qamtamasyz etedi.

Almatyda sońǵy eki jylda qala ǵımarattaryn, nysandary men landshaftaryn keshki jáne túngi nurlandyrýdyń biryńǵaı arhıtektýralyq stılin qalyptastyrý barysynda 120-dan astam mańyzdy arhıtektýralyq obektilerge kómeski jaryq kózderi ornatyldy.

Olardyń arasynda Táýelsizdik Monýmenti, «Qazaqstan» qonaq úıi, «Kóktóbe» telemunarasy, Abaı atyndaǵy opera jáne balet teatry, Respýblıka Saraıy, Áýezov atyndaǵy teatr, Qasteev atyndaǵy mýzeı, Ortalyq meshit, Sváto-Voznesenskıı kafedraldy sobory jáne basqa da mańyzdy ǵımarattar bar.

Almatynyń bir stıldegi arhıtektýralyq jaryq kózderi búdjetten tys qarjy kózderi arqyly júzege asýda.

Aıta keterligi, Almatyda bıylǵy jazda 157 kóshe jóndeledi, 600 aýla kóriktendiriledi. Barlyq jer asty ótpeli joldar kúrdeli jóndeledi, jańa fontandar salynady. Buryn qaıta jasalǵan Panfılov, Jibek Joly, Gogol, Qabanbaı batyr, Baıseıitova, Tólebaev kósheleri men «Astana» alańynan ózge megapolıstiń birqatar negizgi dańǵyldary túgeldeı jańarady.