Bıyl Almatyda búdjetti únemdeý esebinen jaryq jelisi jóndelip, qosymsha joldar salynady.
Almaty qalasy ákimdiginiń baspasóz qyzmetiniń habarlaýynsha, qalalyq máslıhattyń kezekten tys VI sesıasynda bıylǵy búdjet naqtylandy. Memlekettik satyp alýdy únemdeý esebinen júrgizip, jobalardy 9,3 mlrd teńgege oıtaılandyrý arqyly ishki rezervterdi qaıta bólý barysynda naqtylandyrý sharasy jasaldy.
Bıylǵy birinshi jartyjyldyqta Almaty ekonomıkasynyń barlyq salasynda 103,8% ósimge qol jetti. Mysaly, bólshek saýda 8,3%-ǵa, ónerkásip 4,4%-ǵa, qurylys 4,7%-ǵa ulǵaıdy, bes aıdyń ishinde sheteldik ınvestısıa 25,1%-dy qurady. Memlekettik búdjetke salyq túsiminiń 110,3%-ǵa ósýi qamtamasyz etildi.
Búdjetti naqtylaý barysynda únemdelgen qarjy áleýmettik máselelerdi sheshýge, syrtqy jaryq kózderin, trotýarlardy jóndeýge, jańa yqshamaýdandarda jol salýǵa, qaýipsizdikti arttyrýǵa jáne múmkindigi shekteýli jandardǵa qoldaý kórsetýge jumsalady.
Sonymen birge bıyl qalanyń birqatar aýdanynda syrtqy jaryq kózderine jóndeý júrgiziledi. Alataý aýdanyndaǵy Aqbulaq, Alǵabas, Qarasý, Kókqaınar, Uljan-2 yqshamaýdandarynda jol jóndeý bastaldy. Túrksib aýdanyndaǵy Jas qanat eldi mekeninde de jol jóndelip jatyr.
Múmkindigi shekteýli jandarǵa qoldaý kórsetý maqsatynda 675 adamǵa tıflotehnıkalyq, 871 adamǵa sýrdotehnıkalyq jabdyqtar satyp alynady.
“Eńbekke qamtý jáne buqaralyq kásipkerlikti qoldaý” aıasynda myńdaǵan jumyssyz 50 mamandyq boıynsha kásibı daıyndyqtan jáne qaıta daıyndyqtan ótedi.
Jalpy bilim beretin mektepterdi oqýlyqtarmen qamtý úshin qosymsha 193,5 mln teńge qarastyryldy. Qaýipsizdikti arttyrý maqsatynda jeti mektep nysanynda seısmıkalyq tekserý júrgiziledi.
Eske salsaq, “Almaty-2020” damý baǵdarlamasyna jáne qalalyqtardyń áleýmettik máselelerin sheshýge negizdelgen. Almaty búdjeti bıyl 526,7 mıllıard teńge boldy.
