Almatyda bıyl 300-ge jýyq jedelsaty jańartylady.
Almatyda jedelsatylar jańartylyp jatyr. Osy ýaqytqa deıin qalada 130-dan astam kópqabatty úıdiń lıftisi jańartylǵan.
Al bıyl jalpy, 300-ge jýyq jedelsaty jańǵyrtylady. Turǵyn úı sharýashylyǵyn jańǵyrtý baǵdarlamasy Almaly aýdanynda qarqyndy júrgizilýde. Aýdanda bıyl kópqabatty 33 úıdiń lıftisi aýystyrylmaq.
Almaly aýdanyndaǵy bul kópqabatty úıdiń turǵyzylǵanyna jarty ǵasyrdan asqan. Sodan beri jedelsatysy aýystyrylmapty. Qoldanysta bolǵanyna 50 jyldan asqan lıft syr bere bastaǵan. Jandaryn shúbirekke túıip otyryp júrgen turǵyndar ony jańǵyrtýdy bir aýyzdan qoldap, qazir ony almastyrypty.
«Jedelsatyǵa qorqynyshpen kiretinbiz. Joǵary qabattan tómenge jete alamyz ba dep úreılenetinbiz. Sebebi, ol júrgende teńselip turatyn. Toqtap turyp qalatyn kezderi de jıi bolatyn. Jalpy, bul úıde 8 podezd bar. Sonyń úsheýiniń jedelsatysy aýystyryldy. Jyl aıaǵyna deıin taǵy ekeýin jańǵyrtpaqpyz», – deıdi Aleksandra KOMAROVA.
«Aqshasy kóp emes. Biz 3 bólmeli páterge myń teńge kóleminde aqsha tóleımiz. Ary qaraı baǵa tómendeı beredi. 2 bólmeli páter azyraq tóleıdi. Óte tıimdi», – deı di qala turǵyny Nurgúl Qajytaı.
Al Qojamqulov kóshesindegi myna úıdiń jedelsatysy jaqynda aýystyrylmaq. Osy ýaqytqa deıin 70 paıyzdan asa azamat ony aýystyrýǵa óz kelisimin bergen.
«Aptasyna bir ret toqtap qalýy múmkin. Eger jaryq bolmasa durys jumys istemeı qalady. Degenmen, bárimiz aýysqany durys degen oımen qol jınap jatyrmyz», – dedi taǵy bir turǵyn Aıman Omarova.
Almaly aýdanynda osy jyly turǵyn úı sharýashylyǵyn jańǵyrtý baǵdarlamasynyń aıasynda kópqabatty 33 úıde 75 jedelsaty jańasyna aýystyrylmaq. Osy ýaqytqa deıin teń jartysy almastyrylǵan.
«Almaly aýdanynda 1402 kóp qabatty úıler ornalasqan. Sonyń ishinde 503 úıde 854 lıft ornatylǵan. Jańǵyrtý baǵdarlamasy boıynsha 2017 jyly 15 úıde 40 lıft aýystyrylǵan bolatyn», – dedi Almaty qalasy Almaly aýdany komýnaldyq sharýashylyq bóliminiń basshysy Rýslan Astanov.
Almaty qalasynyń turǵyn úı qorynda shamamen, 3700 jedelsaty bar. Sonyń ishinde, 1500-den astamy aýystyrýdy qajet etedi. Turǵyn úıdi jańǵyrtý boıynsha bıyl qalada 266 lıft jańasyna aýystyrylady. Ol óńirlerdi damytý baǵdarlamasy aıasynda júzege asyrylýda.
