Denıs Tenniń anasy Oksana Ten halyqqa úndeý joldady, dep habarlaıdy QazAqparat.

«Qaıǵymyzdy bólisip, osyndaı qysyltaıań shaqta otbasymyzǵa qoldaý kórsetkeni úshin búkil Qazaqstan halqyna jáne halyqaralyq qaýymdastyqqa Denıs Tenniń týystarynyń atynan rahmet aıtqym keledi. Ásirese Nursultan Ábishuly Nazarbaevqa aıtar alǵysymyz erekshe. Prezıdent árqashan Denıske qoldaý kórsetip, kómektesýmen boldy. Sonymen qatar, memlekettik organdar men ákimdikke de kórsetken qoldaýlary úshin kóp rahmet. Qara jamylǵan kúnnen beri qazaqstandyq jáne halyqaralyq BAQ ókilderi birneshe ret habarlasty. Denısten aırylyp qalǵanymyzǵa áli de sene almaı, qaıǵydan es jıa almaı júrmiz, sondyqtan dál qazir jýrnalıserdiń suraqtaryna jaýap berýge ál-dármenimiz jeter emes. Bizdiń ortaq qaıǵymyzǵa, sondaı-aq suhbat berýge daıyn emestigimizge túsinistikpen qaraýlaryńyzdy ótinemiz. Ulymyzdyń abyroıly esimin jadymyzdan shyǵarmaı, tek qana jaqsy sózben eske alaıyqshy», - dedi Oksana Ten. 

Eske salsaq, Qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan qaza bolǵan edi. Oqıǵa Qurmanǵazy men Baıseıitova kósheleriniń qıylysynda 19 shildede túski saǵat 15:00 shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn. 

2,5 saǵatqa jalǵasqan reanımasıalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy. 

Adam óltirý babymen qylmystyq is qozǵaldy.

Keıin belgili bolǵandaı, sportshynyń ólimine qatysy bar eki kúdiktiniń biri ustalyp, ol qylmysyn moıyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqaı aýylynyń týmasy Arman Qudaıbergenovke izdeý jarıalandy.

Sondaı-aq,  Denıs Tenniń ólimine kúdikti Nuraly Qıasov kúzetpen Almaly aýdandyq sotyna jetkizilgen.

Al Denıs Tenniń ólimi boıynsha kúdikti ekinshi adam Arman Qudaıbergenov ustaldy.