QR Bas prokýratýra advokat Baýyrjan Azanovtyń ústinen QR QK 274 baby boıynsha – jalǵan aqparat taratqany úshin qylmystyq is qozǵady.

25 shildede Qazaqstandaǵy adam quqyqtary jónindegi halyqaralyq búronyń saıtynda zańger Baýyrjan Azanovtyń ústinen qylmystyq is qozǵalǵany týraly aqparat jeli qoldanýshylarynyń arasynda qyzý talqylandy. Kóbi zańgerdi jaqtap, ony pikir bildirgeni úshin jaýapkershilikke tartý konstıtýsıaǵa saı emes ekenin jazdy. Baýyrjan Azanovtyń áriptesi Djohar Ótebekov te adam quqyqtary jónindegi halyqaralyq paktide ár adam pikir jáne sóz bostandyǵyna quqy bar ekenin aıtady.

- Jalǵan sóz úshin qýdalaıtyn birde bir eldi bilmeımin. 4 jyl buryn osy normany Qylmystyq kodekske engizgende men BAQ-ta jáne ózimniń blogymda konstıtýsıa, demokratıaǵa saı kelmeıtinin jáne konstıtýsıa boıynsha kórsetilgen sóz bostandyǵy men BUU azamattyq jáne saıası halyqaralyq pakti boıynsha engizilgen pikir bostandyǵyna nuqsan keltiretinin aıtqanmyn. Bul norma órkenıetti elderdiń qylmystyq zańynda eshqandaı balamasy joq.  Adamdar qateleskenniń ózinde sóz bostandyǵy men pikir bostandyǵyn negizge ala otyryp onyń qatelese alatynyn eskerý kerek.

Eger adam naqty bireýdiń abyroıyna nuqsan keltirse ol úshin arnaıy jaýapkershilik bar. Moraldyq shyǵyndy óteý úshin múlkin tárkileý de kórsetilgen, - deıdi Djohar Ótebekov.

"Pedofıldiń qurbany boldy, zorlandy" degen 7 jastaǵy balanyń eks-zańgeri Baýyrjan Azanbekti qoldaýshylar kóp. Onyń balaǵa kómektesý úshin tegin jumys istegenin jáne zańgerdiń jalǵyz ǵana maqsaty - zorlaý isine qatysty barlyq kúdiktini jaýapkershilikke tartý bolǵanyn aıtyp, oǵan arasha surap qol da jınap jatyr.  

Zańger Baýyrjan Azanovty qoldaıtyn myńǵa tarta jeli qoldanýshysy QR Prezıdenti Nursultan Nazarbaevqa zańgerge arasha túsýdi surap, hat jazdy.

Baýyrjan Azanovtyń ózi otandyq BAQ-qa bergen suhbatynda jelide ony qoldaýshylardyń kóp ekenine qýanatynyn jetkizgen edi.

«Osy qylmystyq iste 7 jasar balanyń isine qatysty kúdiktilerdi jaýapqa tartýdy ǵana maqsat tutqan jalǵyz zańgerdi óz múmkindikterin paıdalanyp qýdalap jatqandar óz áreketi arqyly Qazaqstan qoǵamy men álem aldynda  bılik organdary men basqarmasynyń bedelin túsirip otyr. Zańger Azanov tergeý qupıasyn jarıalamaı, sot saraptamasy júrgizilip jatqanyn, áleýmettik jelide áldekimder onyń abyroıy men bedeline nuqsan keltirý úshin shyndyqqa janaspaıtyn aqparatty taratyp jatqanyn halyqqa jetkizdi» dep jazylǵan hatta.

Elbasyǵa arasha surap hat jazǵandar Nursultan Nazarbaevtyń atalmysh qylmystyq iske qatysty aıtqan pikirin mysalǵa ala otyryp, Baýyrjan Azanovqa qatysty qylmystyq isti tirkegender zań boıynsha jazalanýy qajet ekenin basa atap ótken.

Esterińizge sala keteıik, Nursultan Nazarbaev 2018 jyldyń 1 maýsymynda 7 jastaǵy balaǵa qatysty is týraly pikir bildirgen bolatyn.

«Barlyq jerde týystar otyryp alǵan. Qylmystyq ispen aınalysyp jatqan polısıa – týystar, joǵary organdarda otyrǵandar – týystar, odan da joǵarydaǵylar – olar da týystar. Osynyń barlyǵy isti toqtatý úshin jasaldy. Mundaıǵa jol berilmeýi kerek!» degen edi Nazarbaev.

Myńǵa jýyq adam qol qoıǵan hatta jeli qoldanýshylary Azanovtyń atalǵan istegi maqsaty aıqyn bolǵanyn aıtady.

«Zańger Azanov quqyqqorǵaý organdarynan iske qatysty jaýapty adamdardy jaýapkershilikke tartýdy ǵana kózdedi. Sol úshin qoldan kelgenin jasady. Ony jalǵan aqparat tartqany úshin qylmystyq jaýapkershilikke tartý – halyq men halyqaralyq qoǵamdastyqtyń aldynda quqyqqorǵaý organdary men basqarmalardyń bedelin túsiredi, halyqtyń eldegi sot júıesi men quqyqqorǵaý organdaryna senimsizdik paıda bolýyna túrtki bolady.

2018 jyldyń 23 mamyrynda Baýyrjan Azanovqa qatysty isti tirkegender  qatań túrde jazalanýy qajet» dep jazylǵan hatta.  

Zańgerdiń ústinen qylmystyq is qozǵalǵanda onyń saıası astary bar bolýy múmkin ekenin aıtqanda da boldy. Halyqaralyq tájirıbeni negizge ala otyryp, Djohar Ýtebekov te zańgerdiń ústinen qylmystyq is qozǵalýy shekten shyqqandyq dep esepteıdi. 

- Bul jerde adamnyń pikiri úshin qýdalaǵanyn baıqaýǵa bolady. Adamnyń pikiri qate bolsa da ony qýdalamaý kerek. Sondyqtan, men bul adam quqyǵyn shekteıdi dep oılaımyn jáne ony qoldanbaý kerek dep esepteımin.

Baýyrjannyń isinde saıası astar bar dep oılaımyn. Eger prokýratýra onyń áreketimen kelispese, ol zańger ádebin buzdy dep oılasa, Advokattar alqasyna shaǵym túsirý kerek edi, biraq qylmystyq is emes» deıdi zańger.

Esterińizge sala keteıik, buǵan deıin qoǵam qaıratkeri Arýjan Saın óziniń Facebook paraqshasynda sáýir aıynyń basynda 7 jastaǵy balanyń anasy belgisiz jaǵdaıǵa baılanysty zańger Baýyrjan Azanovtyń qyzmetinen bas tartqanyn habarlaǵanyn jazǵan bolatyn.

«Zańger Baýyrjan Azanovtyń qyzmetinen bas tartqany týraly habar oǵan poshta arqyly resmı túrde jetkizildi jáne tergeýshige ótinish berildi. Osydan keıin Baýyrjan Azanov tergeý isine aralaspady, bizben baılanysqa shyqpady. Ol óziniń burynǵy senim bildirýshisine nuqsan keltiretin aqparatty jarıalaýǵa quqyǵy joq» dep jazdy Arýjan Saın.

Ol anasynyń mundaı sheshimge nelikten kelgenin jaza almaıtyny jáne dál sol sekildi  Baýyrjan Azanov ta burynǵy senim bildirýshisine qatysty aqparat jarıalaýǵa quqyǵy joq ekenin aıtady.  

«Balanyń anasy maǵan habarlasty. Ol Baýyrjan Azanovtyń 7 jastaǵy balanyń advokaty emes ekenin halyqtan jasyrǵanyna tańǵalǵanyn aıtady. Zańger sáýirdiń basynan bastap birde bir tergeý isine qatysqan joq. Ádeıi halyqty adastyrdy.

Biz QR Bas prokýratýrasyna osy jaǵdaıǵa baılanysty málimdeme jasaýdy suraımyz. Sebebi tergeý isi jabyq rejımde ótip jatyr. Sondyqtan biz atalmysh iske qatysty eshqandaı túsinikteme bere almaımyz. Osy sebeppen biz onyń 7 jastaǵy balanyń advokaty emes ekenin habarlamaǵan edik» dep jazdy Arýjan Saın.

Áriptesterin qorǵaýǵa astanalyq zańgerler Tólegen Shaıkov, Amanjol Muhamedıarov pen Igor Vranchev nıet bildirgen bolatyn.