20 naýryz. Qamshy.kz -  Búgin Almaty qalalyq ákimshiginde jeńil avto kólikterge arnalǵan aqyly avtoturaqtarǵa qatysty málimdeme jasaldy. Bul týraly "Qamshy" portaly habarlaıdy.

"Eger aqyly avtoturaqtarda arnaıy belgi joq bolsa, kólik júrgizýshisi aqy tóleýge mindetti bolyp eseptelmeıdi. Ol árkimniń jeke qalaýy.  Qazir qaladaǵy kóptegen avtoturaqtardyń ortasha aqysy - 100 teńge.  Eger júrgizýshi aqy tólegisi kelmese, ol onyń jeke sharýasy bolyp tabylady. Iaǵnı, turǵyndarǵa  aqy tóleý mindettelmeıdi", -deıdi qalalyq ákimshilik qyzmetkeri Erkebulan Orazalın.

Al naýryzdyń 14-i kúngi Almatynyń qaq ortasynda bolǵan oqıǵa jurtyń jaǵasyn ustatqan edi.  Ol kezde avtoturaq aqysyn tóleýden bas tartqan kólik júrgizýshisi dúıim jurttyń aldynda turaq qyzmetkerine tapanshadan oq atqan. Osy oqıǵa áleýmettik jeliler men BAQ-ta jarıalanǵannan soń oq atqan júrgizýshi Ivan Hýtor ne úshin osyndaı qadamǵa barǵanyn aıtty.  Ivannyń aıtýynsha ol bul áreketke qorǵaný maqsatynda barǵan.  Al keıbir BAQ-ta  oqıǵa oryn alǵan turaqjaıda arnaıy belgininń bolmaǵanyn jazǵan. Sondaı-aq, aqy tóleýge arnalǵan termınal da bolmaǵan.

"Ol jerge bógde adamdar qaptap ketti. Bári maǵan dúrse qoıa bergen soń men travmatıkalyq tapanshany jerge qaratyp eki-úsh ret oq attym. Biraq, maqsatym kisini jaralaý emes edi. Tek maǵan tónip kele jatqandardy qorqytý ǵana bolatyn. Kórgen adamdar muny tez arada vıdeoǵa túsirip jatty",-deıdi júrgizýshi Ivan Hýtor.

Búginde Almaty qalasynda 70-tiń ústinde aqyly avtoturaq bar. Olardyń birde-bireýinde ákimshilik qyzmetkeri atap ótken belgi qoıylmaǵan. Al ákimshiliktegi jıynda Almatydaǵy turaqjaılardan túsetin qarjynyń 20 paıyzy ǵana qalalyq qazynaǵa túsetinin aıtty. Mysaly,ústimizdegi jyly bul soma 75 mıllıondy quraǵan.

Al turaqjaı qyzmetkerine oq atqan júrgizýshige qatysty qylmystyq is qozǵalyp, Ivan Hýtorǵa qaladan shyqpaý týraly qol hatpen bosatqan.

"Al janjal kezinde basymnan qatty soqqy aldym" degen júrgizýshi bar kináni turaqjaı qyzmetkerine jaýyp, ózi Qaskeleń qalasyndaǵy aýrýhanaǵa jatyp alǵan.  Aıtýynsha, zańdy qujatyn kórsete almaǵan olar birinshi bolyp judyryq jumsapty. Artynan taǵy áriptesterin shaqyrǵan. Olar da sózge kelmesten Ivandy soqqyǵa jyǵa bastapty. Ol azdaı, kóligimdi tonap, tipti aıdap ketpek te boldy deıdi júrgizýshi.

Nurzat Toǵjan