El ishinde shyrqalyp júrgen hıt ánderdiń avtory jalyndy jas aqyn qyz Nazerke Semeı avtorlyq quqyq pen qalamaqy, aınalyp kelgende adamgershilik turǵysy jaıynda óziniń feısbýk paraqshasynda jazba jarıalapty. "Qamshy.kz" aqparat agenttigi erkin oı-pikir alańy ekendigin eskere otyryp, Nazerkeniń jazbasyn qalyń oqyrman nazaryna usynamyz.
"Osy kúnge deıin «Ánniń avtorlary nege tasada qala beredi?», «Nege ánshiler osy sazger-aqyn-óńdeýshi eńbegin durys baǵalamaıdy?», «Nege olardy tek ánshilerdiń ózi ǵana tanıdy, halyq tanymaıdy?» dep talaı jazba shyǵaryp, shyryldaǵanmyn. Shyny kerek, jazǵanymdy elegen jan tabylmady. Pavlodar qalasynda tipti daýysymdy ruqsatymsyz paıdalanyp júrgender jaıly estip, óte qatty kúıindim. Osy másele haqynda Bıbigúl Dáýletbekqyzynan «Osyndaı urylarmen qalaı kúresýge bolady?» dep kómek suraǵanym ras. Ol kisi birden jaýap berip, nómirine habarlasýymdy surady. Áńgimemiz barysynda kózime jas keldi, júregim syzdady.
Áńgimemiz «Ágýgaı, qurbym» ániniń tóńireginde bolǵan soń, Bıbigúl hanym birden «Saltanat Baqaeva osy mátindi jazǵanyń úshin qansha qalamaqy berdi?» dedi... Ótirik aıta almadym. Ándi áýenniń avtory Erhan Aldanazarov arqyly jazǵan bolatynbyz. Án shyqqan soń, hıt bolǵan soń da, beınebaıany shyqqannan keıin de Saltanat hanym ózi «Osy ánimiz hıt boldy, qalamaqyńdy bereıin» dep habarlasa ma dep kúttim. Sebebi meniń sanamda «qalamaqyny suramaıdy, qalamaqyny beredi» degen baıaǵy ata-babalarymyzdan qalǵan túsinik qalyptasqan-dy. Olaı oılaýym qate ekenin tym kesh túsindim. Saltanat hanymnan qalamaqy suramaǵanym úshin men kinálimin be, álde rızashylyǵyn bildirip ózi usynbaǵan ol kináli me – bul men úshin suraq. Dese de, «Ágýgaı, qurbym» áninen keıin Saltanat Baqaevamen Erhan Aldanazarov arqyly taǵy bir án jazatyn boldyq. Bul joly uzatýǵa emes, qyzdy ortaǵa alyp shyǵýǵa arnalǵan án. Qalamaqy suraıtynymdy sazgerge birden eskerttim. Áýendi tyńdap, oǵan «Ádemi-aı» dep at qoıdym. Ondaǵy oıym «Ágýgaı» sózimen kelisti bolsyn degenim. Sózdi jazdym. Sazger de, Saltanat Baqaeva da sózdi unatty. Sol kezde ǵana Saltanat hanym telefon nómirime habarlasty. Ondaǵy oıy qalamaqy somasy jaıly kelisý. Meniń aıtqan qalamaqy mólsheri – 50 myń, onyń usynǵany – 20 myń. Kelise almadyq. Ol ánge mátindi basqa aqynǵa jazdyrdy. Men qarsy bolmadym. Biraq án shyqqan soń ǵana «Ádemi-aı» degen aty qalyp qoıǵanyn bildim. Avtomatty túrde meniń jazǵan mátinim dalada qaldy. 4 jylda kóp ánshimen jumys jasadym. Keıde mátindi unatpaıdy. Eńbek zaıa ketpesin dep, ol mátinderdi basqa sazgerlerge jiberip, án jazamyz. Al bul mátinmen ony da jasaı almadym. Sebebi, qyz uzatýǵa arnalǵan, ári aty «Ádemi-aı» degen taǵy bir án shyqsa, men plagıat jasaǵan bolar edim. Qandaı jaman, á? Sol kezde unjyrǵamnyń qalaı túsip, qalaı jylaǵanymdy kórseńizder ǵoı... Sebebi mátinge birneshe kúnimdi sarp ettim. «Nege dál qazir shyryldap otyrsyń?» dersizder. Aıtaıyn. O kezde jas boldym, ne bary 21 jasta edim. Solaı bolý kerek eken ǵoı dep oıladym. Men birdeńe desem, «Qoıshy, dym tanymaldylyǵy joq myna qyz ne isteı alady?» dep birden aýzymdy jaýyp tastaı ma dep oıladym. Qoldaıtyn adam tabylmady, ári 19 myń shákirtaqy alatyn 4 kýrs stýdentiniń nendeı qorǵaýshysy bolar deısiz?!
Kúni keshe Pavlodarda tipti osy ánge jazylǵan daýysymdy beıtanys bireýler paıdalanyp júrgenderin kórgende, shydamym taýsyldy. «Osy joly úndemeseń, erteń óleńderińniń avtory basqa bireý dep te shyǵar, sol kezde jylaısyń!» dedim ózime. Shyny kerek, Bıbigúl hanym jazǵanymdy oqıdy dep te oılamadym, biraq bir úmit boldy. Allaǵa shúkir, úmitim aqtaldy! Bıbigúl hanymǵa joldaǵan vıdeom tek meniń ǵana emes, ánshiniń kóleńkesinde qalatyn, tipti ánshilerdiń ózi de elemeıtin «sazger-aqyn-óńdeýshi» úshtiginiń aldaǵy shyǵarmashylyq jolynda shyraq bolady degen senimdemin".
