Kezdesý barysynda Nursultan Nazarbaevqa elimizdegi quqyq qorǵaý organdarynyń qyzmeti jáne buǵan deıin júktelgen tapsyrmalardyń oryndalýy jóninde esep berildi.

Elbasy prokýratýra organdaryna azamattar quqyqtarynyń, zańdy múddeleriniń saqtalýy jáne zańnamalardyń oryndalýy úshin joǵary qadaǵalaýdy júzege asyrý mindeti qoıylǵanyn aıtty.

– Búginde elimizdegi zańdylyqty qamtamasyz etý úshin qajetti sharalardyń bári iske asyryldy. Atap aıtqanda, quqyq qorǵaý organdary men sot júıesi reformalandy, tıisti zańdar qabyldandy, sonyń ishinde bıznesti negizsiz tekseristerden qorǵaý týraly másele de qamtyldy. Solardy tek sapaly oryndaý qajet, – dedi Qazaqstan Prezıdenti.

Nursultan Nazarbaev qylmystyq zańnamany izgilendirý jónindegi jumystardy jalǵastyrýdyń mańyzdylyǵyn atap ótip, Qazaqstandaǵy sottalǵandar sany 35 paıyzǵa azaıǵanyn aıtty.

Bas prokýror Memleket basshysyna qylmystyq prosesti reformalaý baǵytynda atqarylyp jatqan jumystar jóninde málimdep, osy is-qımyldardyń nátıjesinde elimizdegi jalpy qylmystyq ister ótken jylmen salystyrǵanda 10 paıyzǵa kemigenin atap ótti.

– Prokýratýra organdary tarapynan azamattardyń quqyqtary men zańdy múddelerin qorǵaý úshin júıeli sharalar qabyldanýda. Bıylǵy alty aıdyń ishinde eńbek quqyqtarynyń saqtalýy, jer qatynastary, tarıftik zańnama salalaryna tekserý júrgizildi, nátıjesinde úsh mıllıonnan asa azamattyń quqyqtary qorǵalyp, qaıta qalpyna keltirildi, – dedi Qaırat Qojamjarov.

Elbasy kezdesý qorytyndysy boıynsha birqatar naqty tapsyrma berdi.